PARTIDO MAN-PIN A HASI SU VISHON “BARIO TA HENDE” KLA PA KÒRSOU MIRA
PARTIDO MAN-PIN A HASI SU VISHON “BARIO TA HENDE“ KLA PA KÒRSOU MIRA
Esaki den un konferensia partisipativo Uniko na Kòrsou
Willemstad, Kòrsou – Djasabra último e konferensia interaktivo “Bario ta hende” a tuma lugá na World Trade Center (WTC) Curaçao, organisá pa partido MAN-PIN. E enkuentro inovativo aki a trese huntu ekspertonan, organisashonnan di bario i residentenan lokal pa desaroyá un vishon pa futuro di barionan sostenibel i inklusivo. Loke tabata úniko di e konferensia tabata e partisipashon aktivo di e partisipantenan: nan a kontribuí direktamente na e diseño di un bario modelo usando un mapa I artefaktonan físiko. Esaki ta marka un aserkamentu nobo pa desaroyo di bario den kua partisipashon di siudadano ta sentral.
E konferensia a kuminsá ku un apertura inspirativo di Giselle Mc William, lider di e lista blou MAN-PIN- despues di kual varios orador a profundisa den temanan esensial pa futuro di nos barionan. Tópikonan manera sostenibilidat, koheshon sosial i bibienda pagabel tabata sentral. Richenel Bulbaai a papia tokante e nesesidat pa desaroyo di barionan duradero. Marien de Langen a papia tokante e importansia di modelonan di hür pagabel, miéntras ku Chris Zwiers a delineá un vishon riba e integrashon di naturalesa i kresementu urbano.
Despues di e seshonnan plenario, partisipantenan tabatin e oportunidat pa mesora pone nan ideanan di un bario sostenibel den práktika. Bou di guia di eksperto Chris Zwiers, ku ya tin eksperiensha vasto riba e tereno aki, entre otro na Boneiru, nan a traha huntu pa desaroyá un bario modelo, dunando input riba infrastruktura, aksesibilidat, distribushon di bibienda i fasilidatnan pa habitantenan. Usando e modelo partisipantenan literalmente a konstruí nan vishon pa un bario sostenibel i habitabel. E proseso partisipativo aki a destaká e poder di envolvimentu direkto di siudadano den trahamentu di maneho i planifikashon urbano.
Durante e konferensia partido MAN-PIN a presentá proposishonnan konkreto pa futuro di desaroyo di bario na Kòrsou. Sentral den esaki ta e introdukshon di un Lei di Konsehonan di Bario, ku ta permití partisipashon direkto di siudadanonan den tumamentu di desishon. Ademas, a hasi yamada pa un planifikashon urbano mas ekológikamente responsabel, mehorashon di normanan di bibienda i distribushon di bibienda, e ròl di sentronan di bario, fasilidatnan deportivo, infrastruktura pa kana, kore baiskel i move, transporte públiko ku ta hasi moveshon fasil, sentronan di salú i varios otro fasilidatnan komo un yabi pa fortalesé koheshon sosial i inklushon den bario.
Na klousura di e konferensia Giselle Mc William, a enfatisá e importansia di trahamentu di maneho inovativo i partisipativo. “E konferensia aki ta mustra ku bario ta hende i habitantenan di bario mester tin un palabra esensial den kon nan ambiente di biba mester ta.”
Giselle Mc. William