Gabinete Silvania vs gabinete Pisas

Esun ta habri Pòst 5, e otro ta kibra speransa di kontratista, trahadó i provedor
Willemstad — Ku masha batimentu di klòk, tur bachá gabinete Pisas a kita kandal foi Pòst 5.
Un siman despues, su mes minister di finansa ta laga sa ku kos ta pinta skur rònt di
aktividatnan riba tereno di refineria. No tin krudo, no tin lisensia pa hasi negoshi ku
Venesuela, no tin timeline tampoko pa Oryx kuminsá hasi e blending ku a nenga nos propio
Curoil. Mirando e kontradikshon aki MANPIN ke sa si na final aki ainda tin gobièrnu, òf si ta
kada minister pa nan kuenta.

Laberinto
Komunidat ke a sa nifikashon di e supuesto habrimentu di Pòst 5. Minister Pisas a reakshoná usando
un kantidat di palabra pa al final bisa ku ela nenga Curoil e oportunidat di hasi blending riba
refineria, pa awo resa pidi ku Oryx podisé kuminsá blend aki un par di aña, sin eksigí di nan ningun
liña di tempu òf invershon entretantu na Emmastad. Foi e laman di palabra di sr. Pisas a sali na kla
tambe, ku apesar ku su partido a primintí di habri refineria limpi na 2021 mes, te awe, despues di 4
aña, e no por sikiera presentá un lei di medio ambiente ku ta permití esaki.
Pa kolmo ta resultá awor ku minister di finansa den e mes gobièrnu Pisas ta asina prekupa ku
ofisialmente e ta tene kuenta ku nunka mas lo tin aktividat produktivo riba tereno di refineria. Segun
e korant lokal Antilliaans Dagblad, ta esei e ministerio di finansa a stipulá den su análisis resien di
riesgo.

Ku ken nos ta piska?
Sabiendo tur esaki, MANPIN ta puntra kon bin no a duna niun indikashon dje peligernan rondó di
nos refineria ora sr. Pisas tabata tofer ke kandal dje porta na Pòst 5? Tin koordinashon entre e
miembronan dje gobièrnu Pisas II? Ta kuantu gobièrnu tin den Fòrti, un di Pisas i un otro dje
minister di finansa? E minister di finansa ta transparente ku su proyekshonnan i kla ku e sobrá ministernan??

Klaridat
MANPIN ta kere ku un hende den Fòrti mester sali duna kontesta riba e preguntanan ariba ya
komunidat ta sa ki ta pasando ku su propiedatnan.
Un elekshon na kaminda no ta libra gobièrnu di bon gobernashon. Anto transparensia rònt di
propiedat di pueblo sigur ta un eksigensia di bon gobernashon.

Visepresidente Partido PIN i kandidato #5 MANPIN:
Kenneth Martis