Ministerio di Salubridat, Medio Ambiente i Naturalesa ta tene dialogo ku sindikatonan di Selikor tokante preokupashon nan pa loke ta regardá e akuerdo di maneho i seguridat di trabou

 

Ministerio di Salubridat, Medio Ambiente i Naturalesa ta tene dialogo ku sindikatonan di Selikor tokante preokupashon nan pa loke ta regardá e akuerdo di maneho i seguridat di trabou

Willemstad-  Djabièrnè 7 di mart 2025, Ministerio di Salubridat, Medio Ambiente i Naturalesa (GMN) a tene un reunion ku e sindikatonan ABVO i BPG. E reunion aki tabata enfoká riba e preokupashonnan ku e sindikatonan a ekspresá tokante e akuerdo di maneho (‘beheersovereenkomst’) entre Selikor i GMN i e garantia di trabou pa su empleadonan.

Selikor ta desempeñá un ròl fundamental den e maneho di desecho na Kòrsou, i e stabilidad di su empleadonan ta esensial pa garantisá un servisio efisiente i sostenibel. Durante e reunion, diferente tópiko a bin na mesa, inkluso:

• e akuerdo di maneho entre GMN i Selikor;
• polítika di desecho (‘afvalbeleid’) inkluso rehuso di desecho (‘recycling’) i sostenibilidat;
• seguridat di trabou pa empleadonan di Selikor.

Ministerio di GMN a duna klaridat ku ta trahando riba e proseso pa finalisá e akuerdo di maneho entre GMN i Selikor. GMN a indiká ku di nan banda nan ta hasiendo esfuersonan maksimo pa sigurá ku e proseso aki ta keda kla na un plazo mas korto posibel, sin afektá e stabilidad di e organisashon tampoko su empleadonan. A enfoká ku pa e aspekto aki, koperashon di gerensha di Selikor ta eminente.

Un punto ku tambe a bin dilanti tabata e politika di desecho i e integrashon di rehuso di desecho den e modelo di maneho di desecho di Kòrsou. Ministerio di GMN ta enfatisá ku e futuro di un sistema di desecho sostenibel ta inkluí un plan pa stimulá separashon di desecho, optimalisá e proseso di rehuso di desecho i redusí e kantidat di desecho ku ta yega na Landfill Malpais. Pa logra esaki, lo tin di tuma medidanan pa inovashon den e kadena di maneho di desecho i reforsá e kooperashon entre sektor públiko i privá.

Por último, Gobièrnu di Kòrsou a garantisá ku ningun empleo na Selikor ta kore peliger durante e proseso di adaptashon i mehoramentu den e maneho di desecho. Selikor lo sigui operá ku un transishon struktural i sostenibel ku ta reforsá su kapasidat pa sigui duna un servisio optimal na komunidat di Kòrsou, mientras ku tambe ta krea mas konsientisashon i partisipashon den redukshon i rehusu di desecho.

Ministerio di GMN i e sindikatonan a ekspresá nan kompromiso pa sigui tene dialogo kontinuo pa garantisá ku e interes di e trahadónan ta keda protehá i pa traha na un solushon struktural i sostenibel pa futuro di Selikor i e maneho di desecho na Kòrsou. E reunion a terminá den un esfera satisfaktorio pa mayoria di e partidonan.