Riba Dia Internashonal di Hende Muhé: Minister di Hustisia Shalten Hato ta stimulá pa mas hende muhé den Kuerponan di Hustisia
Riba Dia Internashonal di Hende Muhé:
Minister di Hustisia Shalten Hato ta stimulá pa mas hende muhé den Kuerponan di Hustisia
WILLEMSTAD, – Dia Internashonal di Muhé ta enfatisá importansia mundial di e oportunidat igual i ta reforsá e yamada pa mas hende muhé den sektornan unda tradishonalmente no tin hopi representashon di e ser femenino, manera servisio di hustisia i seguridat. Ku polítika aktivo i kolaborashon, ta traha pa un ambiente di trabou mas hustu i balansá, unda talento, sin mira género, por desaroyá i kontribuí na siguridat di komunidat.
Diversidat di género den kuerponan di hustisia, manera polis, bombero i otro servisio di yudansa, ta esensial pa un ambiente di trabou inklusivo i efektivo. Un komposishon diversifiká ta yuda na mihó desishon, hopi mas empatia den servisio i un representashon mas amplio di komunidat ku nan ta sirbi.
Pa e motibu aki, Minister Shalten Hato ta pone énfasis riba diversifikashon den Kuerpo di Bombero di Kòrsou. Den kuadro di e proyekto di twinning di hustisia entre Kòrsou i Sürnam, lo tin un bishita di trabou di Kuerpo di Bombero di Sürnam (KBS) na Kòrsou den siman di 24 di mart próksimo. E bishita aki, ku ta kombiná ku reunion di Expertgroep Vakbekwaamheid CAS-BES, ta un oportunidat pa kompartí konosementu i “bèst practices” tokante ròl di e hende muhé den Kuerpo di Bombero i otro servisio di hustisia. Na Sürnam, diversifikashon di género den e kuerponan aki ta mas avansá ku na Kòrsou, i e eksperensia di Sürnam por sirbi komo un ehèmpel pa Kòrsou.
Den kuerponan di hustisia – manera polis, bombero i otro servisionan – representashon di muhé ta keda un reto. Ku kolaborashon i e ekspertisio riba diferente área lo traha pa logra un ambiente di trabou mas inklusivo i balansá. Den esei, durante e bishita di koleganan di Sürnam, lo tin seshon spesial kaminda miembro di Kuerpo di Bombero di Kòrsou i delegashon di Sürnam lo interkambiá eksperensia i diskutí strategianan pa atraé mas hende muhé i duna nan oportunidat di kresementu den e kuerponan.
Forsa, balentia i kontribushon indispensabel di e ser femenino den tur sektor, i partikularmente den kuerponan di hustisia. Nan dedikashon, kurashi i esfuerso ta hasi diferensia tur dia i ta kontribuí na un komunidat mas sigur i hustu. Laga nos sigui traha pa igualdat, oportunidat i rekonosimentu pa tur muhé.
