For di mei 2024, Komishon di Keho Relashoná ku Akshon Polisial (KCPO), a inisiá ku su trabou.

For di mei 2024, Komishon di Keho Relashoná ku Akshon Polisial (KCPO), a inisiá ku su trabou.

WILLEMSTAD – KCPO, Komishon di Keho Relashoná ku Akshon Polisial (KCPO) ta un órgano independiente ku ta enfoká na trata i investigá keho di siudadanonan tokante akshon di polis, ku meta pa yega na mas transparensia, responsabilidat i pa stimulá konfiansa den polis.

KCPO ta eksistí pa duna siudadanonan un plataforma hustu i imparsial unda nan por presentá nan preokupashon i keho tokante akshon di polis. KCPO lo investigá e keho ku kuido i lo rekomendá riba manera pa trata e keho, i si ta nesesario, riba e akshon mes di polis. E meta no ta solamente pa trata keho individual, sino tambe pa kontribuí na mehorashon struktural den Kuerpo Polisial di Kòrsou.

Den mayoria kaso, KCPO ta funshoná komo un órgano konsehero i ta duna rekomendashon na outoridatnan, manera polis òf Ministerio di Hustisia. Ta importante pa komprondé ku KCPO mes no por tuma desishon definitivo òf imponé sanshonnan. Su ròl ta mas pa konsehá i promové transparensia i responsabilidat den akshon polisial. E desishon final den kada kaso ku ser trata dor di KCPO ta ser tuma dor di Kuerpo Polisial mes òf otro instansianan relashoná ku e kaso.

Siudadanonan ku ke hasi un keho òf ke haña mas informashon tokante e manera ku KCPO ta traha, por tuma kontakto via e direkshon di e-mail di Klachten Commissie Politieel Optreden (KCPO) na kcpo@minjustcur.com.