Minister Shalten Hato (BPD) ta kontinuá ku repartishon di mas ku 600 tablets pa skolnan
Minister Shalten Hato (BPD) ta kontinuá ku repartishon di mas ku 600 tablets pa skolnan
WILLEMSTAD –. Na desèmber 2024, Minister Shalten Hato di Ministerio di Maneho di Gobernashon Planifikashon i Servisio Públiko (BPD) a bishitá diferente skol di fundeshi pa hasi entrega di tablet nan. Esaki pa asina kontribuí na desaroyo i konosementu di nos muchanan riba e tereno digital. Ta trata di tablet nan ku a keda uzá durante Senso realisá pa CBS. Despues di Senso tur tablet a keda entregá na CBS i Minister Hato a yega na e magnífiko idea pa repartí esakinan na skolnan.
E repartishon di tabletnan a keda realisá den un kaha di palu ku e keda kombertí den forma di un regalo gigante. Na momento ku e tim a yega ku e kaha na e diferente skolnan, e alumnonan no tabata sa kiko tabatin den e kaha di regalo ku a keda yama ‘E tesoro di konosementu’. E dosente mester a skohe algun alumno pa habri e kaha i saka e regalo ku minister a trese pa e mucha nan.
Na momento ku esaki a keda revelá por a mira i eksperensiá legria den kada mucha su kara. Esaki tabata momento di satisfakshon i emoshon pa minister Hato di por a kontribuí i invertí di e forma aki den e mucha. Kada skol ku a haña e promé bishita, a presentá kanto, baile i tambe skèch pa minister. Minister Hato a hiba algun palabra di motivashon na tur e alumnonan. Pero pa kumpli ku lei i pa protehá tur mucha ku ta bai uza e tabletnan i tambe tin kontrol riba tur e aparato nan, mester a entre otro konfigura kada un di e tabletnan nan aki, blòkia páginanan di adulto i tambe pone e programa nobo i tan gusta riba e tereno di enseñansa yamá ‘Magrid ”.
Ta trata di un programa super atraktivo i edukativo pa e alumnonan kaminda e mucha por haña lès mas interaktivo. Magrid ta e app ideal pa siñamentu di infansia tempran pa muchanan ku nesesidatnan edukativo típiko òf spesial. E programa aki por wòrdu usá pa studiantenan den skol pre eskolar, kleuter òf skol básiko. Magrid ta e app ideal pa siñamentu di infansia trempan pa muchanan ku nesesidatnan edukativo típiko òf spesial. E ta ideal tambe pa studiantenan ku no ta dominá e idioma di instrukshon, mucha di un antesedente di imigrante (siñadónan di di dos idioma),studiantenan riba e spektrum di outismo, muchanan ku sospecho di disleksia, dispraksia òf diskalkulia, studiantenan ku tin difikultat pa tende i tambe ku trastornonan relashoná ku idioma. Esaki ta e motibu ku a tarda un poko pa kaba di entrega e tabletnan na e diferente skolnan, pero minister Hato a opta pa lo mihó pa tur alumno ku ta bai uza e tabletnan aki.
Ayera, awe i mayan lo sigui ku e repartishon di tabletnan na e diferente skolnan. Tantu dosentenan komo e alumnonan a keda sumamente kontentu i satisfecho ku e gesto aki. Ku esaki minister Hato ta sigui kontribuí na desaroyo, formashon i modernisashon na nos komunidat i espesialmente na nos futuro muchanan .
Riba e kombinashon di fotonan por mira e momentonan di repartishon na e diferente skolnan.
