Minister Pisas ta hasi apertura ofisial di bañonan públiko na playa Kenepa Chikí  

Minister Pisas ta hasi apertura ofisial di bañonan públiko na playa Kenepa Chikí

Willemstad- Komunidat di Kòrsou por ta satisfecho ku awor nos tin un playa mas ku ta disponé ku e fasilidatnan básiko pa bishitantenan di e playa. Resientemente Minister di Asuntunan General enkargá tambe ku sektor di agrikultura, medio ambiente i naturalesa señor Gilmar Pisas a hasi apertura ofisial di e bañonan ku a keda konstruí na playa di Kenepa Chikí. Ta pa promé biaha ku playa di Kenepa Chikí ta disponé di baño kaminda bishitantenan por hasi uzo di tualèt, ducha i espasio pa kambia paña di forma gratuito. Tur esaki den kuadro di Minister Pisas su prioridat pa drecha nos playanan públiko pa nos hendenan pero tambe pa turistanan ku ta bishitá Kòrsou.

E bañonan ta konsistí di un parti pa usuarionan maskulino, un parti pa usuarionan femenino i un parti pa usuarionan ku deshabilidat. Interesante pa menshoná ta ku Minister Pisas a skohe pa hasi uzo di energia alternativo pa loke ta trata suministro di koriente pa e bañonan aki. Ya a hasi e estudionan i kontaktonan nesesario pa instalá panelnan solar riba e dak. Hasiendo uzo di energia di solo no ta nesesario paga koriente mensualmente i alabes nos komo pais ta kontribuí ku kombatimentu di kambio di klima. Aki 2 siman e fasilidat aki lo ta operashonal komo ku awor ta den e fase di buska un persona ku lo keda enkargá ku e parti di mantenshon.