Riba dia Mundial di Kuido Oral 2025: BÙS DI DJENTE TA GRÁTIS RIBA BRIONPLEIN DJAWEPS 20 DI MART DI 8 AM PA 6 PM
Riba dia Mundial di Kuido Oral 2025:
BÙS DI DJENTE TA GRÁTIS RIBA BRIONPLEIN DJAWEPS 20 DI MART DI 8 AM PA 6 PM
WILLEMSTAD – Minister di GMN ta invitá pueblo di Kòrsou pa partisipá na e aktividatnan spesial ku ta tuma lugá riba djaweps 20 di mart 2025, den marko di e Dia Mundial di Kuido Oral. E evento ta kuminsá 8:00 or di mainta ku firmamentu di un dekreto ministerial pa kompra di dos (2) bùs di djente nobo. For di 8’or di mainta por traha sita pa esnan ku ta deseá un limpiesa oral riba e bus “Pendiente di bo Djente”. E aktividat ta dura te 6’or di atardi i tin tambe un bali di informashon pa kompartí konseho práktiko pa mantené un salú oral óptimo.
Detayenan di e Evento:
Dia: Djaweps, 20 di mart 2025
Orario: 8:00 a.m. – 6:00 p.m.
Lugá: Brionplein
Aktividatnan:
- Firmamentu di un dekreto ministerial pa kompra di dos bus nobo.
- Kontrolá i limpiesa di djente di esnan ku inskribí (na e Bus di Djente).
- Sténtnan di informashon ku ekspertonan di salú oral.
- Distribushon di material edukativo i muestra di produkto di higiene oral.
Importansia di Kuido Oral
Salú oral ta enserá e kondishon di bo boka, djente i strukturanan fasial ku ta permití hende kome, papia i hari sin problema. Problemanan komun manera karies (deskomposishon di djente), enfermedat periodontal (infekshon), i kanser oral por prevení ku hábitonan saludabel i kontrol periódiko.
Segun estadístikanan global, mas di 3.5 bion hende mundialmente a sufri di malesa oral den 2017, i karies no-tratá ta un di e retonan di salú mas komun. Na paisnan ku entrada limitá, e kosto haltu di tratamentu i falta di akseso na kuido ta agravá e problema.
Medidanan di Prevenshon:
- Laba djente dos bes pa dia (preferiblemente despues di kome).
- Usa enjuague ku flúor ora spula boka.
- Usa ménos suku i bebida dushi.
- Bishita dentista minimalmente un bia pa aña.
- Stòp di huma òf usa produktonan di tabako.
- Usa bals ku xylitol pa redusí ásido den boka.
Historia di Dia Mundial di Kuido Oral
E dia aki a wòrdu establesé na 2007 pa FDI World Dental Federation, na honor di e aniversario di nasementu di Dr. Charles Godon, fundadó di FDI. For di 2013, e fecha ta wòrdu selebrá 20 di mart pa evitá konflikto ku otro evento internashonal. E ophetivo prinsipal ta krea konsenshi i promové kuido oral na tur nivel, spesialmente den komunidatnan vulnerabel.
Komo Ministerio di GMN nos ta enfatisá ku kuido oral ta esensial pa salú general i kalidat di bida. Nos ta enkurashá tur hende, for di mucha te ku hende grandi, pa pasa na Brionplein pa probechá e oportunidat di kontrolá nan djente i siña medidanan básiko pa un sonrisa saludabel.
Prevenshon ta mihó ku kurá!”
