Apertura di Promé Fase di Sentro di Entrenamentu di Brantwer Kòrsou

Apertura di Promé Fase di Sentro di Entrenamentu di Brantwer Kòrsou

WILLEMSTAD, – Kòrsou a logra un paso importante pa Kuerpo di Brantwer Kòrsou. Djaweps 20 di mart 2025, den oranan di atardi na Koraal Specht, a tuma lugá e inougurashon ofisial di e promé fase di Sentro di Entrenamentu di Brantwer Kòrsou. E sentro ta un inovashon fundamental pa e forma i kapasitashon di nos kuerpo di brantwer. Durante e diskurso di Minister di Hustisia, mr. Shalten Hato e la enfatisá ku e apertura di e sentro ta un motibu di orguyo. “Nos a traha duru pa logra e proyekto aki i awe nos ta mira frutanan di esfuerso. Ku e sentro aki, nos ta duna nos brantwer e mihó posibilidat pa entrenamentu, oumentando nan kapasidat i e seguridat di nos komunidat,” Minister Hato a bisa.

Fase 1 di e sentro ta kla i ta ofresé fasilidatnan pa treinmentu den situashonnan realista. A instalá kònteiner spesial ku por wanta kayente, palèt na kandela i ophetonan pa krea simulashon di kandela real, permitiendo asina un eksperensia di práktika realistiko pa e  bombero. Pa loke ta fase 2, e proyekto ta den plan pa ta kla den luna di Aprel 2025. E konstrukshon lo konsistí di vários kònteiner koloká riba otro, kreando un mega struktura ku lo permití diversidat mas amplio di entrenamentunan, inkluyendo situashonnan di reskate na altura i espasio sera. E Sentro di Entrenamentu di Brantwer Kòrsou ta posishoná pa ta un di e mihó den Reino Hulandes. Ku e desaroyo aki, nos brantwer lo por praktiká den un ambiente sigur i den un manera ku ta reflehá reto real ku nan por enfrentá den praktiká.

Brantwer Kòrsou a logra hopi progreso den último tempu, ku hopi desaroyo importante bou di e liderazgo di Minister Hato. E instalashon di e sentro aki ta un paso fundamental den e meta pa trese mas modernisashon i kapasitashon pa e kuerpo di brantwer di Kòrsou.