Minister Shalten Hato ta renobá Parke di Tráfiko despues di kasi 39 aña

Minister Shalten Hato ta renobá Parke di Tráfiko despues di kasi 39 aña

 

WILLEMSTAD –. Minister di Maneho di Gobernashon Planifikashon i Servisio Públiko (BPD) mr. Shalten Hato, ta sigui riba e ruta pa desaroyo di nos pais pa ku modernisashon. Banda di esaki minister Hato semper ta para kla pa invertí den formashon i desaroyo di nos muchanan. Esaki tabata e kaso ora ku minister Hato a re-inougurá Parke di Tráfiko (Verkeerspark) na Damacor, kaminda el a sòru pa renobashon kompletu di e parke i hasi esaki mas atraktivo pa tur nos muchanan. Entre otro un kantina nobo moderno ku dak kaminda ántes bishitantenan tabata para den solo, a laga traha un bodega pa pone material kaminda ántes tabata uza kònteiner , a duna e kayanan di e parke un ‘touch up’ i a traha un área kaminda e mucha nan por rekreá ku diferente kosnan di hunga.

 

Pronto lo bai instalá un opheto di hunga gigantesko di mas o ménos 200 meter i pa pone e chèri riba e bolo a traha un mini brùg Juliana pa e mucha mes por kore i pasa riba dje. Mester bisa ku kada 5 aña Curoil ta hasi mantenshon di e parke, pero aworaki despues di 39 aña minister Hato ta sòru pa modernisá e parke aki ku tur lokual e tabatin mester! E idea aki a presentá un dia ku minister Hato ku ta un fiel bishitante, a bishitá Parke di Tráfiko huntu ku su famia i a tuma nota riba algun kos ku mester keda kambiá i modernisá pa e hasi e parke aun mas dushi, atraktivo i kómodo pa tantu e mucha komo su famia.  Mes ora e minister a bai ku su kolaboradornan pa asina por skucha e deseonan i e nesesidatnan pa ku e parke. Despues di a pone tur kos riba papel, minister Hato a kumpli ku e palabrashonnan aki den korto tempu i asina realisá tur lokual tin ariba menshoná.

 

Segun Rignald Cristina, Presidente di Parke di Tráfiko, nan tabata haña ayudo di vários instansia ku tabata duna un man, paso  nunka no tabatin supsidio pa ku e parke. Pero despues ku minister Hato a mira e importansia pa drecha e parke, mes ora el a hasi esaki un realidat. Minister Hato ku a hiba palabra a indiká ku e ta sumamente kontentu i satisfecho ku e logro aki. Segun minister ku esaki e ta para ketu na e importansia pa Kòrsou tin un tráfiko sigur i p’esei el a invertí den e parke aki kaminda edukashon i formashon ta kuminsá.

Esaki ta un di e tantísimo logronan ku minister Hato ta realisá den apénas 5 luna pa e ministerio di BPD i ta sumamente satisfecho ku tur esakinan.