DIA MUNDIAL DI KONSIENTISASHON DI DOWN SYNDROME BAN TA KONSIENTE KU TUR HENDE TA KONTA NA KÓRSOU

DIA MUNDIAL DI KONSIENTISASHON DI DOWN SYNDROME

BAN TA KONSIENTE KU TUR HENDE TA KONTA NA KÓRSOU

 

Willemstad, Kòrsou – Djeabièrne awo MAN-PIN lo partisipá den e elekshon ku un programa enfoká riba inklusividat i sosten pa tur siudadano, inkluso esnan ku desabilidat. Riba e mesun dia di elekshon nos ta para ketu na e Dia Mundial di Konsientisashon di Hendenan ku Down Syndrome. MAN-PIN ta rekonosé ku kada dia mester ta un dia di promové inklushon i derechonan di esnan ku desabilidat. Den nos “Programa di Vishon i Maneho”, nos ta enfatisá un komunidat kaminda tur hende, sin distinshon di limitashon físiko òf mental, por partisipá plenamente.e siguiente puntonan:

• Nos ta proponé reformanan pa garantisá ku tur persona, inkluso esnan ku desabilidat, tin akseso na servisio sosial esensial ku sosten adekuá.
• Nos lo desaroyá programanan ku ta rekonosé i promové e derechonan di mucha i hóbennan ku desabilidat, eliminando barera pa nan desaroyo kompletu. Nos ta insistí ku tur skol mester tin fasilidatnan di sosten pa esnan ku limitashon físiko òf mental, garantisando nan aksesibilidat kompleto na e sistema di enseñansa.
• MAN-PIN lo eliminá bareranan ku ta stroba personanan ku desabilidat. Gobièrnu tin un responsabilidat partikular pa garantisá ku bareranan pa empleo pa personanan ku desabilidat ta wòrdu eliminá.
• Nos lo inkluí normanan di diseño universal pa bibienda adaptabel, transporte aksesibel i fasilidatnan di komunidat den nos planifikashon urbano. Nos lo introdusí leinan ku eksigí ku servisio di transporte ta aksesibel pa personanan ku desabilidat òf ku mobilidat limitá.
• MAN-PIN ta garantisá ku personanan ku desabilidat por uzá fasilidatnan deportivo i rekreativo pa medio di finansiamentu i programanan gubernamental robusto.
• MAN-PIN lo invertí den outomatisashon di servisio públiko pa mehorá aksesibilidat pa nos grandinan i esnan ku limitashon físiko.

MAN-PIN ta invitá tur siudadano pa uni forsa ku nos pa kreá un futuro inklusivo i sostenibel, kaminda tur hende por kontribuí i prosperá sin eksklushon.

Elekshon ta kos SERIO!