Votashon, ekonomia I défisit demokrátiko. E agènda internashonal di Omar Gill.

 

 

Votashon, ekonomia I défisit demokrátiko.
E agènda internashonal di Omar Gill.

Willemstad – Hulanda i internashonal tambe ta un tópiko importante pa Omar Gill den
aktual kampaña I p’esei mes e tin tres punto importante pa ku esaki.

Votashon
Aktualmente, na Hulanda tin mesun tantu hende desendiente di Kòrsou ta biba komo e
kantidat di abitantenan na Kòrsou. Vários a bai Hulanda pa motibunan ageno pa despues
disidí keda aya. Hopi biaha esnan ku a emigrá pa Hulanda ta keda ku kontakto pero ta pèrdè
e konvivensia ku Kòrsou. Den kuadro di esaki, Omar Gill ta di opinion pa hasi un
investigashon pa laga nos kompatriotanan ku ta biba den eksterior tambe por tin e
posibilidat pa vota den futuro. Awendia via medionan digital nan por sigui tur notisia pa ta
na altura di desaroyo di Kòrsou ku ta nan pais tambe. Dje forma aki Omar Gill ta spera
tambe di trese kas bek nos studiantenan I dimes esnan mas eksperensiá.

Ekonomia
Omar Gill ya a lansa e plan pa establesé un pre-clearance entre Hato I Schiphol pa asina
engrandese e fluho di turista mihó. Omar Gill ta mira oportunidat den otro sektor tambe.
Dos aña pasa vários kotters (barku di piskadó) a wòrdu distruí na Hulanda den kuadro pa
baha e kantidat di piskadó. “Dikon nos no ta invitá e piskadónan aki bin djòin ku nos piskadó
nan aki na Kòrsou, utilisando barku nan mas grandi pa asina krea trabou i piska den nos pais,
ku te asta nos por eksportá den futuro ?” Gill ta puntra. Aktualmente tin barku i piskadó nan
di otro pais ta nabegá den nos awanan.

Défisit demokrátiko
E partido Boeren Burger Beweging (BBB) den nan programa di kampaña a indiká di kier
atendé e aspekto di défisit demokrátiko di e isla nan hulandes den Karibe. “Het
democratisch tekort van de Caribische landen moet zo snel mogelijk worden rechtgezet.”
E punto aki tin aña nan riba agènda di IPKO. Omar Gill ta di opinion ku awor ku BBB ta un di
e partido nan establesé mas grandi na Hulanda, “for di un posishon di under dog”, nan ta
komprondé nos sentimentu i nan lo por aportá pa pone un fin na e défisit aki.