MINISTER HATO LO INTRODUSI UN MANEHO PA KU RETENSHON DIMAS RIBA SALARIO

 

MINISTER HATO LO INTRODUSI UN MANEHO PA KU RETENSHON DIMAS RIBA SALARIO

 

WILLEMSTAD:- Minister di Gobernashon, Planifikashon i Servisio Públiko, mr. Shalten Hato a tuma nota di un karta (memo) interno ku ta regardá retenshon parsial di salario ku ta bai rònt riba media sosial ku a atraé hopi atenshon. Ta trata di un memo interno kaminda ta splika ku den luna di desèmber 2024 mester a hasi un korekshon di mas òf ménos 5% di e mutashonnan kaminda a paga lumpsum di 3% i tambe subida di trapi salarial. Den e proseso aki a paga un kantidat chikí un suma dimas òf di ménos.

 

Na algun okashon minimo, sa surgi ku ta sea hasi pago dimas òf di ménos na empleadonan públiko pa motibunan atministrativo. Durante e luna di yanüari i febrüari a hasi e korekshon di e pagonan di ménos hasí kaba i e empleado públiko ku a risibí e sèn di ménos ja a risibí korekshon di esaki durante e luna(nan) ku a transkurí i aworaki ta bai atendé ku e pagonan ku a hasi dimas. Pues e memo aki a sali di e departamento di salario kaminda den palabrashon ku e funshonarionan di rekurso humano di e diferente ministerionan, mester a kompartí e informashon aki na tur empleado ku a risibí pago dimas ku mester kobra bèk (konforme artíkulo 109 di LMA).

 

Minister Hato despues di a tuma nota di e memo interno mesora a intervení pa yega na un maneho nobo pa si algu asina aki bolbe pasa, pa atendé ku esaki mas mihó.  Ku e maneho nobo aki kual lo keda desaroyá kaminda ta ofisialisá tur retenshon pa medio di un dekreto gubernamental (Landsbesluit). Pues Gobièrnu di Kòrsou mester kumpli di su banda pa hasi e korekshonnan i kobra esaki, pero e ta bai tuma lugá konforme un maneho nobo ku ta rasonabel i aseptabel pa tur hende embolbí.