Siman Santu ku 2 evento impaktante pa konmemorá i selebrá Resurekshon di Hesus
Siman Santu ku 2 evento impaktante
pa konmemorá i selebrá Resurekshon di Hesus
Willemstad- Pasku di resurekshon ta un momento di reflekshoná i selebrá e sakrifisio grandi ku Hesus a hasi pa nos na e krus. E aña akí Iglesia House of Worship ta organisá dos evento spesial pa konmemorá morto di Hesus i tambe selebrá Su resurekshon.
Bièrnè santu 18 di aprel pa 6’or di atardi lo tin un drama impaktante den kayanan di Boca Samí, for di plenchi di Fòrti pa retònde di Boca Samí. Mientras pasku di resurekshon 20 di aprel pa 7’or di anochi na Iglesia House of Worship (Erosweg 52), lo tin un tremendo anochi di alabansa huntu ku Proskuneo i tambe Willy Rodriguez for di Hulanda. Ambos aktividat lo ta grátis pa henter e pueblo di Kòrsou.
E drama espektakular aki ku lo tuma lugá riba bièrnè santu na Boca Samí, lo trese di un forma bibu i impreshonante e bida, morto i resurekshon di Hesus. Mas di 50 aktor lokal ta forma parti di e elenko ku lo presentá e drama aki i tambe lo tin presentashon di kanto i baile di nos muchanan. Lo kulminá e anochi ku alabansa di Proskuneo i tambe Willy Rodriguez.
Riba Pasku di resurekshon pa 7’or di anochi lo selebrá e resurekshon di Kristu Hesus ku un anochi spesial di selebrashon na Iglesia House of Worship, kaminda Proskuneo i Willy Rodriguez lo guia e pueblo di Kòrsou den alabansa i adorashon.
Un invitashon spesial ta bai na Pueblo di Kòrsou kompleto pa bin presensiá e dos eventonan aki ku henter famia i selebrá Kristu Hesus nos Salbador. E eventonan aki sigur lo ta di gran bendishon pa bo bida. Laga nos ban bèk na rekòrdá i selebrá e balor imenso ku Kristu resusitá tin pa nos bida.
