2 DI MEI UN DIA LIBER PA EMPLEADONAN PÚBLIKO

Willemstad – Gobièrnu di Kòrsou ta informá ku dia 2 di mei benidero su ofisinanan lo ta será komo ku e aña aki dia di obrero, ku ta riba 1 di mei 2025, ta kai riba un djaweps i usualmente e demanda di públiko pa un servisio di gobièrnu riba un dia di trabou entre 2 dia liber ta mínimo. Esmas, basta empleado sa tuma liber riba e dianan aki pone ku e presensia riba un dia similar ta mínimo tambe.

Gobièrnu di  Kòrsou a tuma e desishon pa duna tur empleado públiko un dia liber. E dia èkstra aki lo ta dia 2 di mei próksimo. Esaki mirando ku djabièrnè, dia 2 di mei, lo ta un dia ku siudadanonan por lo general ta tuma liber pa hasi nan wikènt un tiki mas largu. Esaki ta konta tambe pa empleadonan públiko. Pa tene gastu operashonal mas mínimo posibel, gobièrnu ta duna tur su empleadonan e dia aki liber i lo duna servisio te e próksimo dia di trabou ku ta 5 di mei 2025.