KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

Operashon Siman Santu 2025 lo ta operashonal di 17 pa 21 di aprel

Operashon Siman Santu 2025 lo ta operashonal di 17 pa 21 di aprel

Willemstad- Resientemente durante di un rueda di prensa ku a tuma lugá na Ministerio di Salubridat, Medio Ambiente i Naturalesa a anunsiá e kolaborashon i koperashon di e diferente ministerionan di gobièrnu i organisashonnan privá ku ta uní pa huntu durante Siman Santu garantisá ku tur kos ta kana bon i na òrdu. Atrabes di añanan Operashon Siman Santu a demonstrá ku e kolaborashon di tur aktor ta sumamente importante pa garantisá seguridat, limpiesa i órden públiko durante Siman Santu.

Meta di proyekto Operashon Siman Santu ta pa sòru pa e fasilidatnan mas básiko ta na lugá pa tur esnan ku ta bishitá nos playanan. Hopi importante ta tambe e seguridat na playanan i riba laman, pero tambe riba nos kareteranan di manera ku usuarionan por mobilisá nan mes di forma safe.

 

Aktornan ku lo traha huntu durante Operashon Siman Santu ta:

●  Kuerpo Polisial (KPC): Mantenshon di órden públiko, kontròl di tráfiko i asistensia na
stakeholders momentu ku esaki ta nesesario.
●  Ministerio di GMN: Kordinashon di OSS 2025, kontròl riba benta i higiena di kuminda
(THZ), kontròl i limpiesa riba playanan, kontakto ku piskadónan, kordinashon en
general di playanan, atendé ku buinan den laman, infrastruktura di edifisionan di
gobièrnu na playanan i aksesibilidat di kamindanan pa bai playanan.
●  Ambulans (FKAK): Kuido di ambulans. Duna kuido asistensia na momentu di
emergensia.
●  Kustwacht den koperashon ku Citro: Órden, vigilansia i seguridat riba laman i kosta.
●  Ofisina di Turismo (CTB): Seguridat na diferente playa públiko i atrakshon turístiko
tantu parti pariba komo pabou. Tur e akshonnan aki ta na benefisio di tantu nos
pueblo lokal komo turistanan ku ta bishitá nos isla den e temporada di Siman Santu.
●  Politur: Patruyá di forma mas frekuente na áreanan di konsentrashon i duna
asistensia na turista kaminda ta nesesario.
●  Inspekshon di Ministerio di Desaroyo Ekonómiko: Kontròl riba aspektonan manera
pèrmit di negoshi, indikashon di preis, orario di operashon di negoshi, propósito di
negoshi i kumplimentu ku leinan ekonómiko.
●  Selikor: Rekohé shushi di kònteinernan, pone tualètnan portátil konforme
palabrashon i konsientisá públiko pa tene nos playanan limpi.
●  Krus Kòrá: Duna promé asistensia riba Bièrnèsantu na playanan di Sta. Cruz i
Caracasbaai.

●  Janthiel Security: Seguridat den área di Janthiel, Brakkeput i Sint Joris.

Operashon Siman Santu (OSS2025) ta bira operashonal djaweps dia 17 di aprel próksimo i ta finalisá djaluna dia 21 di aprel 2025 basá riba palabrashonnan mutuo, koperashon boluntario i estrecho di su aktornan.

Kolaboradónan di Ministerio di GMN lo ta visibel tur e dianan aki na e playanan mas bishitá i semper por aserká nan ku kualkier pregunta òf remarke. Ministerio di GMN i tur stakeholder den Operashon Siman Santu 2025 ta deseá pueblo di Kòrsou engeneral un felis Pasku di Resurekshon.

Leave a Reply

This site uses Akismet to reduce spam. Learn how your comment data is processed.