UN LEGENDARIO MÚSIKO, PERKUSHONISTA PROFESHONAL  I DOSENTE A BAI LAGA NOS

UN LEGENDARIO MÚSIKO, PERKUSHONISTA PROFESHONAL

 I DOSENTE A BAI LAGA NOS

WILLEMSTAD — Direktiva di AMAK, un biaha mas a keda konfrontá ku e notisia tristu ku un gran músiko manera Juni Balentien ya no ta huntu ku nos, sigur si nos tene na kuenta e edat relativamente hóben, e notisia a sakudí Mundu Farandulero kompletu.

Juni, sigur ta un músiko ku a impreshoná pa su karáter, pa su pashón pa músika, pa esfuersonan ku e ta hasi pa e enrikesé su konosementu i tambe pa su profeshonalismo en general.

Ya for di edat hopi hóben, Juni a kuminsa studia na e skol di e músika di e tempu ei F.I.M. bou di direkkshon di maestro di Músika Errol “Toro” Colina d.f.m.

Juni Balentien a yega di forma parti di diferente agrupashonnan musikal lokal. Menshon ta ser hasí di e echo ku na edat hopi hóben, el a remplasá e timbalero di Doble R na un okashon. Agrupashonnan ku ela yega di forma parti dije ta p.e. Caribbean Band, Tune, Highway Band i  pa mayoria parti di su trayektoria musikal den e diferente konstelashonnan di Gio.

Juni tabata un perkushonista ku tabata gosa di atminirashon di fanátikonan ku tabata mustra interes pa su habilidat i téknika ku e tabata demostrá durante su presentashonnan.

For di aña 2005 te ku 2018, Juni a forma parti di e team di dosentenan ku tabata duna lès di músika den barionan di Kòrsou. Den e kaso aki mester menshoná ku Juni a duna lès den 5 bario sigur, kaminda e tabata tin éksitonan enorme i for di e formashon musikal ku e tabata duna. Ela krea hóbennan talentoso ku aktualmente ta formando parti di diferente agrupashon musikal.

Juni tabata un di e dosente nan ku semper bai tabata duna un aporte positivo, pa bini ku ideanan nobo i semper tabata kla pa sostené kolega dosentenan.

Un logro importante di Juni tabata ku ela yuda den gran forma ku e kreashon di ritmo kombiná, despues ku Gibi Doran a krea e base, ta Juni tabata esun ku a kaba di  kompletá e téknikanan korekto pa toka e ritrmo aki, ku a bira un ritmo hopi popular den Hinter Reino Hualndes.

Mundu farandulero sigur lo bai sinti falta di e gran músiko baluarte aki manera Juni tabata, pero e echo ku ela laga un legato atrás, lo pone ku tur esnan ku ta ligá ku farándula lo keda rekoda Juni pa semper.

AMAK ta deseá famia,  fanatikonan i músikonan tur hopi forsa ku e pèrdida sensibel aki i ku su alma sosegá na pas.

 

Direktiva di AMAK