Kòrsou ta skohe pa refinansiamentu responsabel ku sosten di Cft
Kòrsou ta skohe pa refinansiamentu responsabel ku sosten di Cft
2 di mei 2025 – Minister di Finansa a entregá un petishon formal na Kolegio di Supervishon Finansiero Kòrsou i Sint Maarten (Cft) pa risibí konseho tokante tokante refinansiamentu di e debe di obligashon di XCG 140 mion ku ta vense 15 di òktober 2025.
Cft a duna un konseho positivo riba e petishon di Kòrsou pa refinansiá e debe ku ta bai vense dia 29 di aprel 2025. Cft a studia e petishon ku koutela, a skucha e fundamentashon di Minister Silvania i a yega na e konklushon ku refinansiamentu ta nesesario i hustifiká.
“Mi ta kontentu ku e konseho di Cft. Cft ta di akuerdo ku nos ku e ‘Rijkswet Financieel Toezicht’ ta duna espasio pa refinansiá un debe ku ta bai vense. Naturalmente nos ke paga parti di e debe públiko, pero nos no por pone e likides di pais na peliger,” di akuerdo ku Minister Silvania.
Aunke Hulanda a tuma e posishon inisial ku Kòrsou lo mester paga e suma kompleto den un biaha, e Rijkswet Financieel Toezicht (Rft) ta permití eksplísitamente pa refinansiá debenan aktual.
Den e kuadro legal ei, Kòrsou ta hasi uso di su derecho pa salvaguardá stabilidat finansiero. Cft a bai di akuerdo ku e aserkamentu aki i ta rekonosé ku pago kompletu di e debe no ta responsabel na e momentu aki.
Pues, e debe di XCG 140 mion lo no wòrdu paga den un tiru na 2025. Pago di e suma total na e momentu aki lo no ta posibel sin pone e stabilidat finansiero di Kòrsou na peliger.
Tin tres motibu prinsipal pa esaki:
- Restrukturashon di CMC
Tin mester di XCG 87.5 mion pa invertí den ekiponan médiko i mantenshon di e edifisio di hospital (CMC Vastgoed) i XCG 24 mion pa rekapitalisashon di operashon di CMC (CMC Exploitatie). E fondonan aki ta esensial pa kontinuidat di nos kuido di salú.
- Mantenshon di reservanan stratégiko
Kòrsou ta mantené un maneho prudente den kua ta tene un fondo di likides di mínimo XCG 80–140 mion na Banko Sentral (CBCS). Esaki ta fungi komo un fondo di emergensia pa garantisá gastunan imprevisto i kontinuidat di operashon di pais.
- Preparashon pa riesgo internashonal
En bista di posibel medidanan di komèrsio bou di e gobièrnu nobo Merikano ku ta inkluí tarifanan di importashon mas haltu, Minister Silvania ta konsiderá nesesario pa mantené un espasio di likides adishonal. Kòrsou komo un ekonomia chikí i habrí ta vulnerabel pa shòknan eksterno ku por afektá inflashon, forsa di kompra i turismo.
Komo gobièrnu, ta nos obligashon fundamental pa, bou di tur sirkunstansia, mantené sufisiente fondo disponibel pa por realisá nos tareanan públiko. Si nos paga e debe kompletu den un biaha, esaki ta pone hopi preshon riba e posishon di likides di pais i ta afektá nos kapasidat pa kumpli ku nesesidadnan esensial, manera kuido di salú, edukashon i sosten sosial.
E debe di obligashon ku ta bai vense ta forma parti di un seri di debe mas grandi ku Hulanda a otorgá den kuadro di e programa di saneamentu di debe. E asina yamá ‘bulletleningen’, kaminda no tin ningun pago intermedio ta tuma lugá durante e periodo di e debe. Esakinan ta inkluí:
- 2020: XCG 100 mion (rerfinansiá ku un debe ‘lineaire’ di 15 aña, ku 0% interes)
- 2025: XCG 140 mion (petishon aktual pa refinansiamentu)
- 2030: XCG 370 mion
- 2035: XCG 475 mion
- 2040: XCG 582 mion
E debenan aki ta trese piknan haltu den e pago di debenan i esaki ta pone hopi preshon riba e presupuesto di Kòrsou. Pa e motibu ei, Minister Silvania ta boga pa sali for di e forma di ‘bulletleningen’ ei i pa gradualmente pasa pa un forma di pago di debe ku repartishon fiho (lineaire) òf annual (annuïtaire), kaminda e pago di e debe ta tuma lugá gradualmente durante e periodo di e debe. E strategia aki ta yuda pa hiba un maneho di debe responsabel, predesibel i sostenibel.
Gobièrnu di Kòrsou ta enfatisá ku e trayekto aki no ta solamente ta importante for di e punto di bista finansiero, sino tambe ta fundamental pa garantisá un resilensia ekonómiko i kontinuidat sosial. Un balanse saludabel entre pago di debe, invershon i mantenshon di reserva stratégiko ta e úniko kaminda pa bai dilanti.