DIskurso 1 Mei Daisy Coffie

 

 

Protokòl ya ta sirbí

 

Mundu kompleto, inkluyendo Boneiru, su retonan pa futuro ta hopi i kompleho, i den esaki e solushon ku nos mester buska ta solamente realisabel si nos hasié den UNION.

 

Desaroyonan sosial ekonómiko di Boneiru no ta tarea ni responsabilidat di gobièrnu so òf di sektor empresarial(kapital) so òf di sektor laboral so.

 

E ta un esfuerso, un dedikashon i un konsulta òf -si bo ke- yamé diálogo kontinuo entre e tres partnernan menshoná, kualnan ta kargadónan di e desaroyo ei.

 

Por sierto, preparando mi diskurso mi a bai wak e meta ku a lanta e Diálogo Sentral; inisiativa ku a tuma lugá netamente riba selebrashon di Dia di Labor, esta 1 di mei 2013, ora ku diputado Sylvana -(gobièrnu)- a tira e hanskun di un plataforma tripartit i ku esaki a keda mesora rekohé pa tur e sindikatonan reuní e dia ei den UNION den e kurá aki.

 

I pa konfirmá e plataforma aki kual ta un resolushon tambe di e organisashon internashonal di labor , esta ILO, e tres partnernan a formulá nan meta i lanta Diálogo Sentral ku e Akuerdo di Saliña:

 

Pa medio di konsenso kontribuí na un Boneiru sosialmente, ekonómikamente i ekológikamente  duradero i sostenibel. Diálogo Sentral den esei no ta aktua na lugá di e propio responsabilidatnan atministrativo i gubernamental di e partidonan ni di esun di gobièrnu di Reino.

 

Atraves di e añanan nos meser atmití ku e plataforma tripartit aki no solamente a funshoná, sino e tabatin un balor agregá konkretamente na e meta ku a pone na su inisio.

 

Prueba di esei ta e Akuerdo di Kralendijk ku a kontribuí en grandi pa kibra ku e kadena di pobresa ku pa añanan tabatin nos sektor mas vulnerabel prezu.

 

Partidonan i sigur gobièrnu di Boneiru sa tambe di mas kontribushonnan balioso ku e plataforma aki a realisá na bienestar di nos komunidat:

Oumento di suèldu mínimo, diferente leinan laboral nobo i esnan na kaminda lo keda komo prueba di e partisipashon real di union sindikal den e plataforma.

 

Pero tambe partisipashon di sindikalismo den temanan ekonómiko fiskal i otronan a duna i lo sigui duna fruta.

 

Te awe e plataforma aki, ku ta un forma positivo di partisipashon di gremionan kargadó di nos desaroyo sosial ekonómiko, a funshoná den un forma no institushonalisá, esta pa medio di un dekreto.

 

Awe, 10 aña despues, den mi ròl komo un di e 9 miembronan di Konseho Insular, mi ke i ta tira un hanskun nobo, i esei ta: Ban evaluá ku nos por bai na e siguiente nivel di e tripartit aki, i institushonalis’é pa medio di un ordenansa di lei i asina e forma parti integral di un órgano ofishal di partisipashon i di konseho na nos gobernashon lokal.

 

Komo invitado na un fiesta ta nos kustumber pa trese un regalito.

 

Konsiderá esaki mi regalito na e union di sindikatonan na Boneiru.

 

Pabien i sigui padilanti den UNION, UNION ta forsa.

 

 

Daisy Cofffie