Dia internashonal di enfermeria 2025
Thema: Vitaliteit

Damas i kabayeros,
zùsternan, brudernan, profeshonalnan den kuido i estimado koleganan,
Awe, nos ta para ketu na un grupo di hende ku nos no por sin dje. Un grupo di hende ku dia
aden dia afó ta para kla pa yuda otronan, hopi biaha den silensio, i semper ku dedikashon.
Awe, nos ta selebrá ABO. Paso sin zùster i brudernan no tin kuido, i sin kuido no tin vitalidat.
E tema dia e dia internashonal di enfermeria e aña aki ta vitalidat. Un palabra ku ta para pa
forsa, rekuperashon, balansa en envolvimentu. I awe mi kier bisa boso lo siguiente:
Vitalidat ta kuminsá serka bosnan!
Vitalidat ta enserá hopi mas ku djis salú. E ta enserá energia, plaser den bo trabou,
resiliensia – pero tambe siguridat den bo área di trabou, espasio pa kresementu, i e
sintimentu ku bo ta importante.
Mi ke hasi uso di e oportunidat aki pa yama bon biní na e direktor general nobo di CMC, sr.
De Graaf. Mi ta deseá bo hopi eksito den e funshon aki pa huntu nos por logra resolve e
retonan ku CMC a bini ta enfrenta den transkurso di añanan. Pa kuminsá, nos lo reuní
mensualmente pa huntu nos traha riba solushonnan konkreto.
E retonan di CMC no ta solamente finansiero. Pa kolmo gran parti e retonan aki ta kai riba e
skoudernan di e trahadonan di CMC en general i spesifikamente esnan ku ta brinda kuido en
partikular. Na final di kuenta ta esnan ku ta brinda kuido ta e pilar di CMC. Si, ta boso ta e
kurason ku ta bati den CMC.
Pa evita ku entre otro kalidat di kuido ta baha of ku trahadonan mester traha den un
hospital menos optimal nos ta tumando pasonan konkreto manera entre otro e siguiente
pasonan:
1- Nos a aparta Cg 87 mion pa garantisa ku tin e fondonan nesesario pa den e proksimo
añanan nos por sigui hasi invershon den aparatonan mediko i den e edifisio di CMC. E
forma ku lo hasi e invershonnan ya a wordu palabra ku e gerensha di CMC Vastgoed i
den korto tempu lo terminá ku e formalisashon di e plannan aki.
2- E fondonan ku CMC ta risibí serka SVB a wordu oumenta den 2025 konforme e
presupuesto 2025 ku CMC Exploitatie a entrega. Ta asina ku esaki a wordu integra di
forma structural den presupuesto di SVB I tambe di Pais. Esaki ta nifika ku CMC lo haña
58 mion extra den 2025 i 2026 (inkluyendo e doelmatigheidsbesparing di CMC mes).
Entrante 2027 esaki lo bira 68 mion. Den e fondonan aki tin un suma extra di 3 mion ku a
wordu asigna pa mehorashon di e kondishonnan laboral di e empleadonan di CMC. E
fondonan aki mester keda usá door di CMC pa kumpli ku obligashonnan di kuido inkluso
e arbeidsvoorwaarden di e trahadonan. Pues, CMC mester usa e fondonan aki pa ofresé
e kuido akordá, pa duna e konsultanan palabrá, pa realisá e operashonnan akordá i pa
kumpli ku e CAO. Ta importante pa husa e fondonan aki pa reklutá sufisiente personal

kualifiká, pa garantisá kalidat di kuido, pa paga oranan di overtime i pa preveni un lista di
espera muchu largu. Sr de Graaf ta dunando nos e impreshon ku e lo soru pa esaki
sosode tambe.
3- Manera boso sa tin retonan grandi pa lokual ta trata e speshalistanan mediko tambe.
Nan ke tin mas embolbimentu den mehorashon di e kalidat di kuido den CMC. Ta di
sumo importansia pa tur trahadó traha huntu pa por sigui elevá e kalidat di kuido den
CMC. Tur trahadó mester wordu tratá igual. Mi tin sigur ku e director general nobo di
CMC lo usa su konosementu i eksperensha pa logra ku den CMC lo tin un kultura aun
mas fuerte, trahando huntu den perfecto union pa asina alkansa e metanan ku nan lo
pone nan dilanti. Sr. de Graaf sa ku e tin mi sosten pa logra esei. Esaki tambe lo yuda pa
promové vitalidat di henter e personal di CMC. Adishonalmente, mi a laga eksplora e
posibilidat pa subi e salario maksimo pa speshalistanan den CMC, naturalmente dentro
di e kuadro di LNT. Pronto e trayekto di lei ku ta hasi un subida di LNT posibel lo wordu
finalisa.
4- Pa duna un impulso na e likides di CMC mi a disidi di paga e gastunan mediko ku ta
wordu hasi pa e personanan indokumentá, den forma di un voorschot kada kwartaal.
Esaki mi a palabra resientemente ku Sr. De Graaf. Di e forma aki mi ta mustra mi
goodwill den direkshon di CMC un bia mas i mi ta duna di mi banda pa asina trabounan
den CMC por sigui di un forma mas optimal posibel. Pesei mas tarda djarason CMC lo
risibi Cg 5 mion pa kuido na personanan indokumentá.
Pa terminá, mi kier yama henter personal di CMC masha danki. Masha danki, pa e persona
ku boso ta. Pa e trabou duru ku boso ta hasi. I danki pa e echo, ku tur dia di nobo, bosnan ta
salba bida di miembronan di nos komunidat!
Huntu ku gerensha di CMC, vooral e direktor general, nos lo sigi evalua puntonan di
atenshon pa garantisá ku e trahadonan di CMC I pueblo en partikular por sigui gosa di un
hospital na nivel.