Kòrsou ta sigurá partisipashon na e kabel di fibra óptiko bou di awa CELIA, Un paso importante pa futuro digital di region Karibe

Kòrsou ta sigurá partisipashon na e kabel di fibra óptiko bou di awa CELIA
Un paso importante pa futuro digital di region Karibe

Willemstad, 15 di mei 2025 – Gobièrnu di Kòrsou a dal un paso importante den fortalesimentu
di Kòrsou su infrastruktura digital. Via e empresa estatal Aquatel N.V., Kòrsou lo konektá na e
sistema nobo di kabel di fibra óptiko bou di awa CELIA, ku ta konektá Aruba, Boneiru, Kòrsou i
Florida (E.U.) ku otro.
Partisipashon di Kòrsou den e proyekto stratégiko aki a wòrdu konkretisá siman pasá durante
un bishita di trabou di Minister di Finansa, Señor Javier Silvania, na Aruba. Den diálogo direkto
ku maneho di Setar N.V. – e kompania di telekomunikashon di Aruba i ko-desaroyadó di e
kabel, a sera akuerdonan eksitoso tokante e kondishonnan di pago i e struktura di e
garantianan nesesario. Ku esaki, a eliminá un opstákulo importante pa konekshon di Kòrsou na
e sistema nobo di kabel aki.
E proyekto ta enserá tantu kompra di “dark fiber” komo kapasidat di transmishon riba e kabel
dor di Aquatel, na balor di un montante total di 21 mion dòler. E konekshon di Kòrsou na e
sistema di CELIA lo ta kla na aña 2027 i lo ofresé banda di variedat di grado di frekuensia
(bandwith), redundansia i konekshon direkto ku sentronan di data na Merka.
Instalashon di e sistema di CELIA lo ta realisá pa Alcatel Submarine Networks (ASN), un
kompania rekonosé na nivel mundial pa loke ta trata retnan di komunikashon bou di awa. ASN
ta responsabel pa diseño i instalashon kompletu di e infrastruktura di kabel.
Minister Charles Cooper di VVRP, ku ta responsabel pa infrastruktura digital, ta referí na un
logro grandi “Ku e invershon aki nos ta garantisá futuro digital di Kòrsou. Akseso na diferente
rutanan di konekshon bou di awa ta fortalesé nos posishon komo un hub di telekomunikashon
regional i ta redusí nos vulnerabilidat ekonómiko.”
Minister Silvania a enfatisá e importansia di e akuerdo establesé: “Nos a hiba diskushonnan
konstruktivo na Aruba i nos a haña garantianan kla. E kondishonnan finansiero ta kla,
manehabel i na interes di un infrastruktura ku ta orientá riba futuro.”
Gobièrnu lo duna sosten finansiero via un garantia gubernamental òf pa medio di un
“escrow-account” (un kuenta spesial di sèn òf propiedat ku ta retené esakinan te na momentu
ku kumpli ku sierto kondishonnan). Implementashon di e proyekto lo sigui den e siguiente
lunanan bou di liderato di Aquatel, den kooperashon serkano ku Setar i otro partisipantenan den
e konsorio.
Ku e konekshon na CELIA, Kòrsou no solamente ta fortalesé su konektividat digital, sino tambe
su posishon den desaroyo di ICT regional. Minister Silvania ke gradisí Minister Cooper,
Aqualectra i RAC pa e éksito di e proyekto aki.