PREPARASHONNAN TA KONTINUÁ PA NOS SELEKSHON NASHONAL ENFRENTÁ ST. LUCIA DIA 6 DI YÜNI 2025 AKI NA KÒRSOU! NOS HUNGADÓNAN TA KONOSÍ!
PREPARASHONNAN TA KONTINUÁ PA NOS SELEKSHON NASHONAL ENFRENTÁ ST. LUCIA DIA 6 DI YÜNI 2025 AKI NA KÒRSOU!
NOS HUNGADÓNAN TA KONOSÍ!
Preparashonnan ta tumando lugá pa nos partidonan di kualifikashon pa Mundial di FIFA riba diannan 6 i 10 di yüni 2025. Nos promé partido lo tuma lugá den Stadion Ergilio Hato pa mitar di 8 di anochi kaminda nos lo enfrentá St. Lucia djabièrnè, 6 di yüni próksimo.
Seguidamente nos lo biaha pa Aruba kaminda nos lo enfrentá Haiti dia 10 di yüni den Compleho Deportivo Guillermo Prospero Trinidad.
Nos ‘bondscoach’ sr. Dick Advocaat huntu ku su staf tékniko ta publiká e lista di 24 hungadónan ku lo representá Kòrsou durante nos kompromisonan pa kualifikashon pa Mundial di FIFA pa yüni 2025.
E siguiente hungadónan ta forma parti di nos selekshon pa nos próksimo partidonan;
- Eloy Room
- Tyrick Bodak
- Trevor Doornbusch
- Sherel Floranus
- Juriën Gaari
- Rhu-Endly ‘Cuco’ Martina
- Joshua Brenet
- Juninho Bacuna
- Leandro Bacuna
- Kevin Felida
- Godfried Roemeratoe
- Joshua Zimmerman
- Rayvien Rosario
- Kenji Gorré
- Rangelo Janga
- Jearl Margaritha
- Jürgen Locadia
- Brandley Kuwas
- Gervane Kastaneer
- Roshon van Eijma
- Tyrique Mercera
- Livano Comenencia
- Ar’Janny Martha
- Jeremy Atonisse
Karchinan pa nos partido kontra St. Lucia ya ta disponibel na e puntonan di benta di kustumber; 4th of July snack, Pòmp di gasolin Sta Maria, Mensing’s Caminada i Botika Mampuritu.
Aparte di nan, e siguiente puntonan di benta aki tambe a bin aserka pa fasilitá tur nos fanátikonan aun mas.
- Corendon (Travel Agency)
- Ennia (Sambil)
- Mangusa Hypermarket
- Zanzibar
- Cabana Beach Club
- Goisco (Schottegatweg Noord)
Na e punto di bentanan aki lo bai tin un ‘ticket boot’ rekonosibel ku logo di FFK, un empleado i un mashin di ‘swipe’ pa tur esnan ku ta deseá por kumpra nan karchi. Na e puntonan di benta aki lo no por paga ku sèn kèsh pero solamente ku tarheta di debito òf tarheta di kredito. Por kumpra karchi na e punto di benta aki riba djárason, djaweps, djabièrnè i djasabra riba e siguiente fechanan; 21, 22, 23 i 24, 28, 29, 30 i 31 di mei i tambe riba dia 4, 5 i 6 di yüni te ku 3’or di atardi.
Na ofisina di FFK tambe lo tin karchi disponibel for di 9’or di mainta te ku 5’or di atardi durante siman. Na FFK tambe nos ta hasi un súplika na nos fanátikonan pa hasi uso di nan tarheta di debito òf tarheta di kredito ya ku no por paga ku sèn efektivo.
Ainda bo no tin bo karchi pa Kòrsou vs St. Lucia???
Kumpra bo karchi lihé pa no lamentá despues…nos ta topa dia 6 di yüni pa mitar di 8 di nochi den Stadion Ergilio Hato!
16 mei 2025
