Minister Hato tin atenshon pa seguridat den tráfiko Alrededor di 46,4% di vehikulonan kontrolá dor di KPC no tin dokumentonan na òrdu

Willemstad – Minister demishonario di Hustisia, mr. Shalten Hato, ta satisfecho riba e trabounan ku Kuerpo Polisial Kòrsou a ehersé último dianan tras di lomba relashoná ku kòntròlnan atministrativo di tráfiko. Den kuadro di e kampaña ku a inisiá na Desember 2024, bou di e nòmber “Kita Tur”, a sali na kla ku aproksimadamente 46.4% di e vehíkulonan kontrolá no tabatin nan dokumentashon na òrdu, manera rijbewijs, seguro òf prueba di kur balido.

E kòntròlnan durante e dianan ku a pasa a keda intensifiká di parti di KPC na diferente punto stratégiko, ku e meta prinsipal pa pone órdu bèk den nos tráfiko i mehorá seguridat públiko. E sifranan detektá ta indiká ku no opstante ku a trese e maneho di Kita Tur, ku ahinda hopi ta e outomobilistanan ku ta riska di subi vianan públiko ku vehíkulonan ku dokumentashon no na òrdu i ta krea situashonnan di potensial peliger pa tur partisipante den tráfiko.

Minister Hato a enfatisá ku e situashon aktual ta reflehá un grado preokupante di irresponsabilidat for di sierto segmento di outomobilistanan. “Manehá un vehíkulo sin dokumento na òrdu no solamente ta un violashon di lei, sino tambe ta un akto ku por komprometé seguridat di otro siudadanonan,” segun e minister.

Mas aleu minister Hato tambe a ekspresá su apresio pa e dedikashon, profesionalismo i akshon firme di e miembronan di KPC, ku ta lanta e nivel di kumplimentu di lei den nos komunidat. E kòntròlnan aktual no ta un evento isolá, sino un parti integral di un plan struktural pa siguí fortifiká seguridat riba nos kayanan i stimulá kumplimentu di lei i regla den nos komunidat. Ministerio di Hustisia ta afirmá ku e kòntròlnan lo kontinuá den un forma planifiká i intensifiká. Pueblo ta wòrdu yamá pa kolaborá i tuma su responsabilidat den tráfiko na serio, ku e konvikshon ku seguridat ta un derecho, pero tambe un deber pa tur hende.