PAR ta desmentí kòmbersashon ku MFK riba kambio òf eliminashon di lei di screening

 

 

PAR ta desmentí kòmbersashon ku MFK riba kambio òf eliminashon di lei di screening

Ku asombro suskrito a tuma nota di deklarashonnan di Minister Cooper djasabra último den un programa radial, kaminda e ta deklará di a papia ku tur parlamentario enkuanto kambio òf eliminashon di lei di screening i ku a base di esei e sa ku su kambio di e lei lo pasa parlamento ku 21 voto pro.

Na promé lugá, PAR ta desmentí ku un di su parlamentarionan a papia ku Minister Cooper tokante un inisiativa di lei pa eliminá òf kambia lei di screening.

Na di dos lugá, ta imposibel ku un parlamentario por duna opinion riba un inisiativa di lei, sin nunka a mira ni e inisiativa di lei, ni e konsehonan riba esaki.

Ta importante pa aksentuá, ku PAR ta kere den e nesesidat di un lei di screening pa “kandidaat Minister”, pa asina protehá integridat di gobernashon, sigur den un pais chikí manera esun di nos.

Reglanan manera ku un minister no tin mag di tin un strafblad i ku e no mag di tin interes privá ku por interferí ku imparsialidat di su desishonnan ta importante i ta komun na Antia i na Kòrsou muchu promé ku introdukshon di e lei di screening na 2012. Pues ta temanan ku no ta limitá e derechi demokrátiko di nos pueblo, sino ta protehá esaki.

Ku e lei di screening aktual no ta perfekto ta un echo i esaki ta wòrdu aksentuá dor di tur instansia konserní.

PAR ta dispuesto na hiba un debate riba kon interpretá i hasi e lei di screening mas hustu i efektivo pa protekshon di integridat di gobernashon. No pa elimin’é i logra lo kontrali.