Minister di Finansa ta anunsiá ku Lei di Kuenta Bankario Básiko lo drenta na vigor dia 1 di yüli 2025

Willemstad, 22 di mei 2025 – Minister di Finansa ta anunsiá ku e Lei di Kuenta Bankario Básiko
(Landsverordening basisbetaalrekening) lo drenta na vigor dia 1 di yüli 2025. E lei aki ta obligá
bankonan pa, bou di sierto kondishonnan, duna tur residente akseso na un kuenta bankario básiko.
E lei ta enfoká prinsipalmente riba esnan ku te awor, pa motibunan komersial òf falta di
dokumentashon, no tabatin akseso na e sistema di pago normal.
Ku e lei nobo aki, ta tuma un paso importante den direkshon di inklushon finansiero. Pa hopi
siudadano — prinsipalmente esnan ku ta traha den sektor informal òf ku ta haña entrada iregular
— un kuenta bankario básiko ta nifiká no solamente un akseso práktiko na servisionan bankario,
pero tambe un forma di rekonosementu sosial i independensia. E kuenta bankario básiko aki ta
duna akseso na funshonnan esensial, manera risibimentu di salario, hasimentu di transakshonnan,
traspaso di sèn, i lantamentu òf depositamentu di sèn. Pero fasilidatnan di krédito manera ‘bai den
rood’ òf konekshon ku tarheta di krédito no ta permití. Tampoko no por uza e kuenta aki komo
kuenta di spar.
Minister ta enfatisá ku e lei aki ya a pasa den Staten dia 1 di febrüari 2025, i ku bankonan tabata
informá bon na tempu tokante e plan pa e lei drenta na vigor. Pues, ta spera ku e preparashonnan
nesesario ya a tuma lugá. Segun e minister, kualke suspenshon adishonal lo ta sosialmente i
ekonómikamente iresponsabel, hustamente pasobra ta trata di un grupo ku ta dependé
primordialmente di e tipo di servisionan bankario básiko aki.
Personanan ku den pasado a wòrdu rechasá pa falta di adrès fiho, falta di historial di trabou òf
problemanan finansiero anterior, awor lo tin derecho pa haña un kuenta bankario fásil i funshonal.
Solamente den kasonan estriktamente deskribí, banko por rechasá un solisitut, manera si e persona
ya tin un kuenta bankario, si no por establesé un identidat konfiabel òf si resientemente tabatin
abusu. Banko tin dies dia di trabou pa evaluá un petishon kompletu, i den kaso di rechaso, mester
motivá, sin ningun gastu, dikon e solisitut a wòrdu rechasá. Tambe, banko mester duna
informashon tokante e prosedimentu di keho, e ròl di Banko Sentral di Kòrsou i Sint Maarten i e
derecho ku e konsumidó tin pa tuma akshon legal si ta nesesario.
Tambe a deliniá e kondishonnan kla pa seramentu di e kuenta. Asina por sera un kuenta, si denter
di un periodo di 24 luna no tin transakshon, si no tin interes real mas den e kuenta òf si e doño di e
kuenta pasa e límite di depósito máksimo ku Banko Sentral a establesé strukturalmente.
Ademàs, e gastunan di e kuenta bankario básiko mester ta mas abou ku e gastunan di un kuenta
normal. Banko Sentral lo determiná e montante máksimo ku por wòrdu depositá kada luna i ki tipo
di dokumento banko por pidi den proseso di aplikashon.

2
Ku e introdukshon di e Lei di Kuenta Bankario Básiko aki, e meta ta pa tur residente di Kòrsou —
independiente di nan orígen òf situashon finansiero — por haña akseso na e sistema di pago, un
parti fundamental pa partisipashon integral den bida sosial i ekonómiko di nos isla.