Minister ta enfoká riba un servisio di ambulans optimal i duradero

Willemstad, 22 di mei 2025 – Durante e últimonan añanan, a traha duru pa mehorá kuido di
ambulans na Kòrsou. Na 2024, Minister di Salú, Medio Ambiente i Naturalesa (GMN), Javier
Silvania, a invertí un total di 1.35 mion florin na kompra di tres ambulans nobo kompletamente
ekipá. E invershon aki a kontribuí na renobashon i ekspanshon signifikante di e flota di ambulans
di Fundashon Kuido Ambulans Kòrsou (FKAK).
Resientemente, dos ambulans nobo mas a yega na nos isla. A selektá e vehíkulonan aki
spesífikamente a base di e kapasidat i abilidat di por pasa den kayanan smal, manera kayanan den
Punda i Otrobanda. Esakinan ta kayanan kaminda ambulans normalmente tin difikultat pa pasa.
Ekspanshon di e flota di ambulans aki ta un paso konkreto pa logra reakshoná mas rápido i pa
perkurá pa mihó aksesibilidat den situashonnan di emergensia.
Minister Silvania ta suprayá ku e esfuersonan aki ta parti di un trayekto mas amplio pa optimalisá
i profeshonalisá e servisio di ambulans. Den kolaborashon ku entre otro SOAB i instansianan
internashonal di konseho, a diseñá un trayekto di mehorashon struktural. Esaki ta enfoká riba:
reforma organisatorio, kalidat di kuido médiko, maneho di personal, stabilidat finansiero i
mehorashon di e posishon legal di empleadonan.
Den kuadro di e plannan di mehorashon struktural aki, Konseho di Minister a disidí riba 20 di mart
2024, pa pone e personal di kuido di ambulans bou di un organisashon di ehekushon nobo den
ministerio di GMN. Aktualmente ta trahando riba implementashon di esaki. Den e lisensia otorgá
na FKAK via un Disposishon Ministerial na ougùstùs 2024, tin sierto kondishonnan spesífiko inkluí,
ku lo mester duna sosten pa un transishon na ordená i kuidadoso.
Durante e periodo di transishon, FKAK lo kontinuá ku su servisio diario, pero lo duna koperashon
kompletu pa realisashon di e transishon. Minister Silvania ta ekspresá su apresio pa e aktitut
konstruktivo i e dedikashon di e personal, ku ta trahando huntu ku e ministerio riba un servisio di
ambulans moderno i bon organisá.
Ku e direkshon aki, e minister ta konfirmá su kompromiso pa un kuido di ambulans aksesibel,
profeshonal i konfiabel pa tur habitante di Kòrsou.