Kòrsou ta publiká lei di Sistema di Garantia di Depósito

CBCS a inisiá implementashon di Sistema di Garantia di Depósito
WILLEMSTAD/PHILIPSBURG — Centrale Bank van Curaçao en Sint Maarten (CBCS) a kuminsá
implementá e Sistema di Garantia di Depósito (DGS) pa Kòrsou. DGS a keda introdusí dia 31 di
mart 2025, ku publikashon di e Landsbesluit depositogarantiestelsel (P.B. 2025, no. 53). Na
mes momento, Minister di Finansa di Kòrsou a firma un areglo ministerial ku ta elaborá detaye
adishonal di e DGS. Pa Kòrsou, DGS lo drenta na vigor dia 1 di yüli 2025. Introdukshon di DGS
ta kontribuí na konfiansa den sistema finansiero di Kòrsou i ta alsa stabilidat finansiero den e
union monetario.
E DGS ta konta pa e institutonan di krédito establesí na Kòrsou ku tin un pèrmit di CBCS. Instituto
di krédito internashonal no ta kai bou di e lei akí. DGS ta protegé plaka riba kuenta bankario na
momentu ku un instituto di krédito no por kumpli ku su obligashonnan. Pa kada doño di kuenta i
pa kada instituto di krédito, e sistema di DGS ta kubri te Cg 50.000 pa institutonan bankario i te Cg
25.000 pa koperativa di spar. DGS lo pèrkurá pa, denter di 20 dia di trabou, e doñonan di kuenta
perhudiká risibí e parti di nan depósito ku e sistema ta kubri. E plaka pa esaki lo bini di e fondo di
garantia di deposito (DGF). E Fundashon di Garantia di Depósito ta wòrdu lantá aktualmente i lo
manehá e fondo akí. E institutonan di krédito lo kontribuí tur aña na e fondo. E montante di e
kontribushonnan ei lo ser kalkulá a base di e volúmen di depósito garantisá ku tin na kada instituto
di krédito. Huntu, CBCS i Fundashon DGF lo ehekutá tur funshon i tarea relashoná ku e DGS.
Den kolaborashon estrecho ku Ministerio di Finansa di Sint Maarten, CBCS ta trahando riba
introdukshon di DGS pa Sint Maarten tambe. E DGS di Sint Maarten lo ofresé e mesun protekshon
pa doñonan di kuenta na e institutonan di krédito establesí na Sint Maarten.
Publikashon di e dekreto nashonal akí ta un paso importante pa yega na realisashon di DGS pa
Kòrsou.

Willemstad, 23 di mei 2025
CENTRALE BANK VAN CURAÇAO EN SINT MAARTEN