Temporada di Horcan a Cuminsa

 Preparacion Por Salba Bida

 

ORANJESTAD, Aruba – (1 di juni 2026) – Awe, 1 di juni, oficialmente ta marca e inicio di temporada di horcan pa region di Caribe y Atlantico y ta dura te cu 30 di november. Apesar cu Aruba ta situa pafor di e area principal unda mayoria horcannan ta pasa, nos no por asumi cu nos nunca lo wordo confronta cu e efectonan di un horcan of tormenta tropical.

 Historia a mustra cu fenomenonan natural por cambia direccion inesperadamente y afecta nos region.

Directie Volksgezondheid (DVG) ta encurasha comunidad pa tuma e momento aki pa prepara nan mes, nan famia y nan hogar. Calamidad no ta avisa. Preparacion na tempo por salba bida y reduci e impacto di un emergencia.

Tin varios paso facil cu cada famia por tuma awo mes:

• Revisa bo plan familiar di emergencia.
• Percura cu bo tin awa, cuminda y medicamentonan suficiente.
• Warda documentonan importante den un lugar sigur.
• Conoce unda bo por haya informacion oficial durante un emergencia.
• Papia cu bo famia tocante loke cada persona mester haci den caso di calamidad.

DVG den colaboracion cu CMO a desaroya informacion y guianan practico pa yuda comunidad prepara pa diferente tipo di calamidad, incluyendo horcan, teremoto, tsunami y incendio. E materialnan aki ta disponibel na website oficial di DVG.

Nos ta invita tur ciudadano y residente pa bishita e pagina Calamidad riba website di DVG y tuma accion awe. 

Preparacion no ta algo cu bo haci ora un menaza ta cerca. E miho momento pa prepara ta prome cu e emergencia yega.

Pagina Calamidad DVG:

https://share.google/F0srHY2hwJ2LjM1gC

Calamidad no ta avisa, Preparacion por salba bida.

Bo Salud, Nos Prioridad

Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, ricibi tur informacion den Aruba Health App, bishita www.dvg.aw, yama 5224200 of manda email na servicio@dvg.aw