Despues ku FKA a risibí 2 vehikulo di ambulans marka Iveco for di Gobièrnu di pais Kòrsou, ta reina preokupashon bou di e personal di FKA ku a drenta den kontakto ku sindikatonan CBV i ABVO pa motibu ku tin varios punto di atenshon pa ku e vehikulonan nobo aki.

Un di e puntonan di atenshon ta ku e vehikulonan ta standard enbes di automatic, manera e ambulansnan anterior. Alabes e kaminda pa e shofur sinta den e vehikulo ta pèrtá ku ta evitá di por manehá e ambulans adekuá.

Otro punto ta ku lo mester bolbe kibra dak i muraya di CMC manera mester a hasi tempu ku e vehikulonan di ambulans marka Ford a drenta den funshon, pa e vehikulonan marka Iveco aki por pasa.

Personal di FKA a hasi petishon na nan sindikatonan pa atendé ku e situashon aki pa motibu ku e personal ta nenga di manehá e vehikulonan nobo aki di e forma aktual.