Enkuesta di Stakeholder 2025: CBCS ta skor positivo

Enkuesta di Stakeholder 2025: CBCS ta skor positivo
WILLEMSTAD/PHILIPSBURG—Centrale Bank van Curaçao en Sint Maarten (CBCS) a publiká e
resultadonan di e di tres enkuesta ku el a realisá bou di su stakeholdernan. Un total di 188
stakeholder a partisipá, representando un nivel di partisipashon di 40%. Pa gran parti, e
resultadonan ta stabil òf faborabel kompará ku e enkuestanan anterior, ku a keda realisá na
2020 i 2022. CBCS su imágen a bai dilanti i a skor mihó e biaha akí pa su prestashonnan.
Ademas, e stakeholdernan tin un opinion mas faborabel di e manera ku CBCS ta kumpli ku su
tareanan prinsipal.
E büró di investigashon independiente RE-Quest a realisá e enkuesta di stakeholder na mart 2025.
E kuestionario tabata disponibel na hulandes i ingles. Ku e enkuesta, a purba haña un bista di e
persepshon i eksperensia di e stakeholdernan pa loke ta trata e manera ku CBCS ta komuniká, su
imágen públiko, su prestashonnan, e manera ku e ta kumpli ku su tareanan prinsipal i e áreanan
kaminda nan ta mira espasio pa mehorá. Meskos ku den e añanan anterior, a manda e enkuesta
pa un variedat amplio di stakeholder, tantu entidat supervisá manera banko, kompania di trust,
seguro i invershon, komo sierto grupo ku no ta kai bou di supervishon di Banko, manera entidat di
gobièrnu, büró di konsulta i instituto akadémiko. E aña akí, a puntra e partisipantenan ademas kiko
nan ta pensa di e kampaña pa introdusí florin karibense (XCG).
E kontestanan tokante e kampaña pa introdusí florin karibense a indiká ku mayoria di e
partisipantenan a risibí informashon via korant i e medionan sosial. Mas o ménos unu di kada tres
partisipante a asistí na un di e presentashonnan di CBCS. Por sierto, e partisipantenan a duna e
presentashonnan akí un skor entre ‘bon’ i ‘ekselente’. Mayoria no tin nada kontra introdukshon di
e moneda nobo, aunke algun ta kuestioná ku a opta pa un moneda nobo en bes di adoptá dòler
estadounidense, kuantu e transishon a kosta i si e tabata realmente nesesario.
Tambe, e stakeholdernan a indiká ku, mas i mas, nan ta balorá CBCS su esfuersonan riba tereno di
komunikashon i kalidat di servisio, aunke tin di nan ku ainda tin krítika riba Banko su supervishon i
ta mustra riba e nesesidat di sigui vigilá e kasonan di ENNIA i Giro.
Fuera di esei, tin sinku tema importante ku a bini padilanti den e preguntanan habrí:
1. Traha riba komunikashon i transparensia
2. Mantené konfiansa i integridat den supervishon
3. Apoyá inovashon digital i finansiero
4. Adaptá supervishon na e tamaño i komplehidat di kada instituto
5. Hisa nos reputashon internashonalmente i optené mihó akseso internashonal
E resultadonan ta sirbi komo informashon balioso pa CBCS por sigui mehorá su servisio i
komunikashon, na armonia ku su meta di ta un entidat di supervishon finansiero moderno,
aksesibel i konfiabel.
E rapòrt ta disponibel pa download na: https://www.centralbank.cw/publications/stakeholders-
survey.
Willemstad, 5 di yüni 2025
CENTRALE BANK VAN CURAÇAO EN SINT MAARTEN
