Minister Javier Silvania: Minister di Finansa ta enfatisá importansia krusial di registrashon di UBO

Riba 2 di yüni último, a sali un artíkulo den e korant lokal Èxtra, ku e título “fiskalistanan ta pidi atenshon urgente pa protekshon informashon den registro UBO.” Despues di investigashon mas aleu a sali na kla ku ta trata di un karta anónimo dirigí na e minister. E minister ta lamentá ku un remitente anónimo, ku ta presentá su mes komo un representante di e sektor di asesoria fiskal, ta trata pa krea miedu i duda tokante e legitimidat di e registro di UBO.

E datonan den e registro di UBO ta wardá den un ‘cloud’ europeo ku ta protehá ku un seguridat estrikto. Tur informashon den e cloud aki ta protehá. Pa motibu di e lokalidat i struktura, e informashon den e registro aki ta kai tambe bou di e Ordenansa General Europeo di Protekshon di Datonan (Europese Algemene Verordening Gegevensbescherming – GDPR).

Intenshonalmente no ta publiká e medidanan di seguridat eksakto. Esaki pa motibu ku publikashon di e detayenan operashonal por mina e seguridat i trese riesgonan indeseá.

Aparte di e GDPR, e Landsverordening Bescherming Persoonsgegevens (LBP) tambe ta kompletamente aplikabel riba e proseso di datonan relashoná ku e registrashon di UBO. Esei ta nifiká ku datonan personal no por keda wardá mas largu ku e tempu ku ta estriktamente nesesario, pa e fin ku a kolektá òf prosesá e datonan. E obligashon aki ta aplikabel pa manehadó di e registro (Kámara di Komèrsio) i tur outoridat ku tin akseso na e datonan.

Ademas, funshonarionan ku den nan funshon ta tuma nota di e informashon di e registro di UBO, ta mará na e obligashon di sekresia segun artíkulo 62 di e Landsverordening Materieel Ambtenarenrecht. Nan por uza e informashon aki solamente den kuadro di nan tareanan legal i pa ningun otro motibu.

Ademas, personanan relashoná ku e registro tin derecho pa pidi pa wak e datonan den nan propio registrashon. Basá riba artíkulo 6, insiso 7 di e Landsbesluit UBO-registratie, e Sekretario di Kámara di Komèrsio ta duna e persona ku ta UBO, riba su petishon, derecho pa wak e datonan ku ta registrá tokante su mes persona.

Minister di Finansa ta enfatisá ku e registrashon di UBO no ta un asuntu opshonal i ku e preokupashon tokante e seguridat di datonan personal no ta un argumento bálido pa no kumpli ku e obligashon legal di registrashon di UBO.

E obligashon aki ta parti di e strategia nashonal i e plan di akshon kontra labamentu di plaka i finansiamentu di terorismo. Esaki ta di gran importansia tambe den kuadro di e evaluashon mutuo di CFATF (MEVAL). Minister di Finansa ta hasi un yamada un biaha mas na tur persona ku ta un UBO pa kumpli ku e registrashon na tempu pa evitá multa òf sanshon.