Florin karibense finalista di prestigioso premio internashonal

Florin karibense finalista di prestigioso premio internashonal

WILLEMSTAD/PHILIPSBURG – Dia 28 di mei 2025, e serie di moneda di florin karibense a keda
elegí komo finalista di e premio Excellence in Currency 2025. International Association of
Currency Affairs (IACA) ta otorgá e premio anual akí komo un rekonosementu na e
organisashonnan ku a demostrá ekselensia den produkshon, prosesamentu, maneho i
distribushon di biyete i moneda.
E serie di moneda di florin karibense a keda nominá den e kategoria Best New Coin/Coin Series. E
moneda konmemorativo di 2 euro, emití na okashon di Weganan Olímpiko di 2024 na Paris, a sali
ganadó den e kategoria akí, miéntras ku e di kuater serie di moneda desimal di Suráfrika a sali di
tres finalista. Entrega di e premio a tuma lugá na e Konferensia di Moneda na Bangkok, Tailandia,
kaminda mas di 400 profeshonal di industria di moneda mundial a bini huntu.
IACA ta un organisashon di miembro, independiente i sin fin di lukro, fundá na 2004, ku ta traha
pa fomentá ekselensia den sirkulashon di valuta. E organisashon ta sirbi komo un plataforma pa
interkambio di konosementu i kolaborashon riba tema di importansia stratégiko pa industria di
valuta. Membresia di IACA ta konsistí entre otro di vários banko sentral, entidat emisor di valuta,
suministradó di moneda i biyete, i instituto finansiero di rònt mundu.
Kòrsou i Sint Maarten ta sumamente honrá ku a elegí nos serie di moneda komo finalista. E bunita
rekonosementu akí ta sirbi pa resaltá tur e kolaborashon i dedikashon ku a hiba na realisashon di
e serie di moneda di florin karibense. Un danki ta bai na nos suministradó di moneda Royal
Canadian Mint pa nan ekspertisio i kolaborashon profeshonal. Nos ta masha orguyoso di mira ku
e esfuersonan di tur esnan enbolbí ta ser rekonosé i balorá riba plano internashonal.
Willemstad, 6 di yüni 2025
CENTRALE BANK VAN CURAÇAO EN SINT MAARTEN