A kuminsá ku trabounan pa limpia Sargassum ku den boka di Ascencion

A kuminsá ku trabounan pa limpia Sargassum ku den boka di Ascencion

Willemstad – Manera ya ta ampliamente konosí, Kòrsou a eksperensiá atrobe un temporada ku kantidatnan grandi di e alga marino Sargassum a yega nos kosta i a akumulá den diferente boka. Momentu ku e Sargassum aki kuminsá putri e ta kousa hopi molèster di holó stinki pa habitantenan di e área. Esaki sigur ta e kaso na boka Ascencion. E situashon aki ta forma peliger tambe pa turtuga pasobra momentu ku nan drenta den un di e bokanan ku ta kompletamente tapá ku Sargassum, nan no por bini ariba bèk pa hala rosea i nan ta hoga.

Durante fin di siman ku a pasá, riba indikashon di Minister di Asuntunan General enkargá ku sektor di Agrikultura, Medio Ambiente i Naturalesa señor Gilmar Pisas, a start ku limpiesa di e boka. Di e forma aki ta aliviá habitantenan di a área di e holó malu i ta skapa bida di turtuganan ku drenta e boka. Na e momentunan aki e kontratista ta hasiendo uzo di ekipo pisá pa saka e Sargassum for di laman i pone esaki na kantu pe seka. Despues ku e seka e holó no ta forma molèster mas i e ta bira mas fásil pa transportá pa Landfill. E trabounan di limpiesa lo dura mas òf menos 1 luna.