Minister di St. Maarten na Kòrsou pa bishita di trabou
Minister di St. Maarten na Kòrsou pa bishita di trabou
Willemstad – Minister di Agrikultura, Krio di Bestia i Piskamentu di St. Maarten señora
Grisha Heyliger- Marten tabata na Kòrsou pa un bishita di trabou. Durante e bishita e
minister a hasi un petishon na su kolega Minister Presidènt di Kòrsou señor Gilmar
Pisas, pa e por haña rekordido na algun empresa òf projekto ku ta relashoná ku su
sektor. Minister Pisas a enkargá un kolaboradó di Ministerio di GMN, señor Doran pa
guía Minister Heyliger- Marten den e rekorido pe bishitá algun empresa i projekto.
Primeramente e la keda risibí dor Sekretario General di GMN señor Sharlon Melfor.
Seguidamente a bishitá e projekto di konstruí FAD’s (struktura den laman pa atraé
piská) pa sektor di peska lokal. Minister Heyliger- Marten tabata sumamente
impreshoná di e projekto. E minister a papia ku líder di e projekto señor Dilrosun ku a
duna splikashon. Minister Heyliger- Marten a duna di konosé ku e ta bai hasi tur loke ta
na su alkanse pa Kòrsou yuda St. Maarten konstuí algún FAD’s pa nan piskadónan.
Despues a bishitá AVB (ántes LVV) kaminda e minister a mira krio di diferente bestia.
Seguidamente a bai na e kompania Kòrsou Fresku ku ta planta hasiendo uzo di
teknologia hidropóniko. Aki e propetario señor Van Wonderen a duna un splikashon
amplio di e kompania i e teknologia.
Por último Minister Heyliger- Marten a bishitá e “Poultry Farm Nuestra Familia”. E
minister tabata sumamente enkantá di mira un hóben desaroyá su propio empresa.
Minister Heyliger- Marten a bisa e hóben ku e ta bai sòru pa e por bai St. Maarten pa
yuda impresarionan di St. Maarten inisiá un farm pa asina yuda nan traha riba seguridat
alimentisio.