CBCS ta hisa suma máksimo pa troka ANG pa XCG te na 20.000 florin


CBCS ta hisa suma máksimo pa troka ANG pa XCG te na 20.000 florin
WILLEMSTAD/PHILIPSBURG – Centrale Bank van Curaçao en Sint Maarten (CBCS) a adaptá su
reglanan1 pa troka ANG pa XCG e promé biaha sin mester pidi sita, hisando e suma máksimo di
NAf 2.500 pa NAf 20.000. E kambio akí ta drenta na vigor inmediatamente. Ku otro palabra, e
promé biaha ku un persona bai troka plaka na CBCS, e por troka te ku 20.000 florin sin mester pidi
sita. CBCS ta hasi e kambio akí den su maneho pa fasilitá e proseso di troka biyete i moneda di NAf
pa esnan ku no tin un kuenta di banko.
Pa por troka mas ku NAf 20.000, ainda mester pidi un sita via wèpsait di CBCS:
https://www.centralbank.cw/exchange-request. Pa troka suma riba NAf 20.000, mester presentá
sierto dokumento pa konfirmá orígen di e plaka (source of funds). Ora ku hasi e sita, por subi
(upload) e dokumentashon nesesario online. CBCS ta implementá su maneho di trokamentu di
plaka konforme e reglanan di AML/CFT (kontra labamentu di plaka i finansiamentu di terorismo).
Ademas di a hasi e fleksibilisashon akí, CBCS a tuma nota ku tin sierto preokupashon den
komunidat tokante loke vários banko komersial ta kobra pa troka ANG pa XCG i e echo ku, na
algun kahero outomátiko (ATM), ta na dos denominashon so por lanta plaka. CBCS a komuniká e
preokupashonnan akí na e partidonan en kuestion i lo sigui den deliberashon ku nan al respekto.
Promé ku e fecha di introdukshon, a palabrá den konsulta ku e bankonan komersial ku nan lo
ofresé a lo ménos un opshon pa troka NAf sin gastu. Danki na e palabrashon akí, tur persona na
Kòrsou i Sint Maarten ku tin un kuenta di banko por troka florin di Antia Hulandes pa florin karibense
sin kosto. Sin embargo, tin biaha, e opshon sin kosto ta enserá ku bo mester depositá e suma riba
bo kuenta na un banko komersial via un ATM. Si un empresa òf persona no tin un kuenta di banko,
e por troka su sèn sin kosto na CBCS.
Pa loke ta trata e denominashonnan disponibel na e ATMnan, CBCS a hasi un inventarisashon den
konsulta ku e bankonan komersial i esaki a mustra ku mayoria di e bankonan komersial ta
ofresiendo tres diferente denominashon na nan mashinnan di ATM. E bankonan ku ta ofresiendo
dos denominashon so ta bai studia e posibilidat di ofresé unu mas aserka.
1 https://www.centralbank.cw/publications/announcements/2025/bekendmaking-aangepaste-
omwisselprocedure
Entrante 1 di yüli 2025, NAf lo stòp di sirbi komo moneda legal. Esei ta nifiká ku, entrante e fecha
ei, ofisialmente no por usa NAf mas pa paga kuné. No opstante, por sigui troka NAf na e bankonan
komersial te dia 31 di mart 2026, i na CBCS te 31 di mart 2055. Pa mas informashon, CBCS ta referí
na e página di pregunta frekuente na https://www.caribbean-guilder.com/faq.
Por último, CBCS ta urgi un i tur pa no aseptá pa troka plaka pa otro persona a kambio di niun tipo
di pago, ya ku e tipo di petishonnan ei por tin di aber ku froude finansiero òf labamentu di plaka i
por pone bo bira involukrá, konsiente- òf inkonsientemente, den aktividat kriminal.
Willemstad, 17 di yüni 2025
CENTRALE BANK VAN CURAÇAO EN SINT MAARTEN
