Karta di Girigorie pa Presidente di Parlamento
Na: Presidente di Parlamento di Kòrsou
Sr. F. Brownbill
Wilhehninaplein 4
Presente
Willemstad, 18 jüni 2025
Tópiko: Preokupashon enkuanto efektividat di konvokashon di reunionnan
Honorabel sr. Brownbill,
Pa medio di esaki mi ta aserkábo enkuanto lo siguiente.
Den mi disertashon durante e reunion di komishon sentral di 22 di mei último, mi a ekspresá mi preokupashon pa e echo ku a konvoká e reunion asina lat, ku a hasi práktikamente imposibel pa kualke parlamentario por prepará su mes na un forma debí pa e reunion.
Mi a splika ku ta djamars 20 di mei 3 minüt pasa di 12 di mardugá, parlamentarionan a risibí un email ku e konvokashon pa un reunion djaweps mainta 9’or. Pues ta djamars mainta, parlamento por a tuma nota di e reunion aki.
Pa e reunion aki mester a prepará pregunta riba 2 lei. E promé lei a trata di kambio di nos kódigo penal, ku en total 52 página di dokumento. E di dos lei a trata “Ofresedó di sistema di pago digital” i tabata trata 207 artikel i en total 486 página di konsehonan tékniko.
Ta opvio ku durante e reunion ta poko parlamentario tabatin pregunta dirigí riba kontenido di e lei.
Momentu ku mi a ekspresá mi preokupashon na sr. Presidente, e kontesta tabata ku e
konvokashon a subi RIS djamars mainta i no djarason, loke m’a menshoná eróneamente.
Pues no a duna seriedat na mi preokupashon ekspresá.
Djaweps 12 di yüni mainta, a tuma lugá reunionnan di komishonnan fiho pa asina apuntá vise presidente di e komishonnan. Konvokashon pa e reunionnan aki a wòrdu risibí mesun dia, esta djaweps 12 di yüni, 3 minüt pasa di 12 di mardugá. Pues ta e mainta di e reunion por a tuma nota di esaki.
Sr. Presidente, manera bo ta na altura, e trabou parlamentario no ta konsistí di solamente sinta den ofisina i bai reunion yamá (último ora), sino tambe di vários tipo di reunion, charla i aktividat ku gruponan den nos komunidat, pa asina por hasi nos trabou di representá e komunidat di Kòrsou mihó.
Pa medio di esaki mi ta supliká sr Presidente enkaresidamente pa hasi un esfuerso pa
reunionnan wòrdu yamá na tempu (mas tantu posibel ku por ehèmpel 5 dia di trabou di
antisipashon), di forma ku parlamentarionan por prepará i hasi nan trabou na un forma
efektivo. Esaki ta konta aún mas momentu ku tin vários miembro di parlamento nobo.
Mi ta gradisíbo di antemano pa duna atenshon na e preokupashon aki pa mehorá
funshonamentu di parlamento i mi ta semper dispuesto pa den un kombersashon personal interkambiá idea pa mehorá funshonamentu di parlamento.
Atentamente,
Quincy Girigorie
Lider di Frakshon di PAR