Diskurso di Minister-President Gilmar Pisas durante Selebrashon di Dia di bandera 2025
Asuntunan General i Promé Minister
Diskurso di Minister-President Gilmar Pisas durante Selebrashon di Dia di bandera 2025
Publiká riba 02 Yüli 2025
Willemstad 2 di yüli 2025 – Ku protokòl sirbí, mi ke yama tur ku ta presente i tur ku ta sintonisá nos via kualke medio di komunikashon, òf plataforma digital, un bon bini na e dia tan memorabel aki.
Tur aña di nobo “Dia di Bandera” ta un momentu importante den nos historia. Bandera ta trese un sintimentu di speransa, di union den un destino komun i di dignidat. Esaki ta e spiritu ku nos ke sigui stimulá awe, riba un fundamentu di amor pa patria, sakrifisio i fe den progreso.
Awe nos ta selebrá nos bandera – símbolo di nos union, nos lucha i nos speransa pa un mihó futuro. Un símbolo ku ta rekordá nos ku e trabou pa Kòrsou no a kaba — e ta kontinuá kada dia, kada aña i kada generashon segun e retonan ku nos ta konfrontá riba nos kaminda. Ta p’esei, Dia di Bandera ta un momentu sagrado pa nos reflekshoná konhuntamente riba kiko nos a logra, i mas importante, unda nos ta bai.
Durante e último 4 añanan, nos a mira un kresementu ekonómiko signifikante, un bahada grandi den desempleo, i un mehorashon drástiko den nos finansa públiko. Aparte di esaki, nos infrastruktura ta birando dia pa dia mas moderno i fasilidatnan pa deporte i rekreo ta oumentando mas i mas den nos barionan. Tur esaki i hopi mas ta motibu pa selebrashon.
Sinembargo, nos ta konsiente ku e progreso aki no por laga nos siegu pa e retonan ku ainda ta eksistente den nos pais. Nos ta papia di retonan demográfiko, sosial, ekonómiko i den nos salubridat públiko.
Komo Gobièrnu nos ta di opinion ku desaroyo ekonómiko sin hustisia sosial ta un ilushon. Nos no por selebrá si nos pueblo no ta sinti e benefisionan den nan bida real. Ekonomia ta un pilar importante, pero nos pueblo ta e fundamentu real di nos progreso. Esaki ta trese kuné ku nos tin ku atendé e retonan ku ta stroba un bon desaroyo den e kalidat di bida di nos pueblo. Ta p’esei Gobièrnu lo no sinta ketu: nos ta determiná pa ataká e retonan ku nos ta enfrentá den forma struktural, sostenibel i solidario ku esnan mas vulnerabel den nos sosiedat.
Tambe nos lo pone hopi atenshon riba nos hóbennan komo e simia di e futuro di nos pais. Si nos ke konstruí un pais mas fuerte, mas hustu i mas stabil, nos mester kuminsá ku nos hóbennan. Si nos ke un pais ku ta duradero i vibrante, nos mester pone atenshon riba e progreso di nos hubentut.
Nos hóbennan ta talentoso i kreativo. Nan ta ekselente den deporte, arte, teknologia i hasimentu di negoshi. Pero hopi di nan ta krese den barionan ku no ta duna nan sufisiente oportunidat. Esaki ta un realidat ku nos mester atendé di forma struktural. Nos no por lagá e generashon aktual di hóbennan sinti ku nan no ta konta.
Ta p’esei e momentu a yega pa nos pone un fundamentu fuerte den e barionan, espesialmente esnan ménos privilegiá. Nos barionan mester bira sentro di speransa, edukashon i desaroyo humano, espesialmente pa nos hóbennan. Kada kas i kada famia mester sinti ku nan ta parti di nos nashon.
Tur esaki ta motibu pa Gobièrnu kuminsá ku un proyekto di rekonstrukshon di nos nashon (“Nation Building”) ku ta un di e prioridatnan di Gabinete Pisas III. Den e promé fase nos lo konsentrá riba un grupo di barionan piloto kaminda e nesesidatnan ta mas grandi. Ku un plan di akshon di mas aña, nos lo deliniá ki servisionan sosial mester ta presente den nos barionan pa realisá un transformashon real, esta pa nos barionan bira sosialmente mas sostenibel i seif.
Den e kuadro aki:
- Nos tin ku ataká pobresa na su rais, pa trese mas dignidat i pa empoderá nos siudadanonan.
- Nos tin ku introdusí programanan despues di skol pa promové guia despues di skol, i hasimentu di deporte i arte.
- Nos tin ku alsa nivel di kuido preventivo den barionan, tresiendo fasilidatnan médiko mas serka di pueblo huntu ku kampañanan di konsientisashon.
- Nos tin ku hasi bida sosial mas agradabel, ku lugánan seif den barionan ku ta limpi i bon iluminá.
- I riba tur kos, nos tin ku hisa kalidat di bida di e famianan mas vulnerabel den nos barionan, ku atenshon pa kasnan pagabel, akseso na awa pa konsumo doméstiko i energia sostenibel.
Pa evitá e konsekuensianan negativo relashoná ku e envehesimentu di nos sosiedat, manera e preshon desproporshonal riba nos fondonan sosial, nos tin ku traha duru pa nos hóbennan i adultonan yòn ku ta den eksterior regresá Kòrsou, pa asina nos komunidat tin un balansa den su struktura di edat.
Banda di rekonstrukshon di nos nashon, nos ekonomia mester sigui desaroyá, pero den un manera mas diversifiká. Ta p’esei, banda di turismo, nos ta evaluando proyektonan nobo den diferente sektor, manera: teknologia di informashon i servisionan digital, industria kreativo, produkshon agríkola moderno i energia renovábel.
Ademas e sektornan nobo mester tin e potensial pa stimulá eksportashon di produkto i servisionan pa Kòrsou por bira un aktor dinámiko den region.
Nos sektor di salú tambe lo wòrdu reformá. Nos ta trahando pa baha listanan di espera, baha gastunan di remedi, hasi e operashon di CMC mas sostenibel i garantisá e sostenibilidat di nos fondo di seguro básiko. Tambe nos lo pone mas atenshon riba prevenshon di malesa i trata pa trese kuido médiko mas serka di pueblo den nos barionan.
E proseso di rekonstrukshon di nos nashon lo pèrkurá pa nos siudadanonan sinti ku nan bida tin balor agregá den progreso di nos nashon. E kontribushon di kada siudadano, grandi òf chikí, ta esensial den e proseso pa rekonstruí un Kòrsou mas fuerte i mas uní.
Rekonstrukshon di nos nashon no ta un tarea di gobièrnu so! Tur hende tin ku pone su skouder bou di e tarea huntu ku gobièrnu. Si kada un di nos duna un aporte chikí, e total di aportenan lo ta grandi sufisiente pa nos progreso kolektivo komo pueblo di Kòrsou. Ta p’esei mi ta hasi un yamada riba kada siudadano:
-
- pa bira un ehèmpel pa bo famia, konosínan i amigunan;
- pa bira mentor pa un hóben ku ta buskando su kaminda;
- pa duna un man na un hende di edat avansá ku tin mester di dje;
- pa yuda ku aktividatnan despues di skol i
- pa bira boluntario den barionan di Kòrsou.
E bandera ku nos a lanta awe, e bandera sagrado di Kòrsou, no ta simbolisá solamente historia, sino futuro. Un futuro di un pueblo ku ta traha huntu pa adelanto di su pais. Un Kòrsou kaminda tur hende por sinti nan mes digno pa karga nos bandera. Kaminda un hóben por soña grandi i logra esei. Kaminda un hende di edat por biba ku dignidat. Kaminda e trabou ku nos ta hasi awe, ta pone e fundeshi di mañan.
Mi ke invitá hinter pueblo di Kòrsou pa tuma awe un momentu di refleho pa honra tur esnan ku a traha duru pa nos ta kaminda nos ta awe. Pa rekonosé e sakrifisio, pasenshi i speransa ku nan tabata tin pa un mihó futuro pa Kòrsou. Laga nos sigui konstruí riba e skoudernan di nos antepasadonan un Kòrsou kaminda nos tur por ta orguyoso di dje.
Ku fe den Dios, ku konfiansa den nos mes i ku amor pa nos pueblo, awe nos ta renová nos kompromiso ku nos patria, pa sirbi nos bandera di e mihó manera posibel, ku determinashon i balentia. Tur esaki na bienestar di nos hóbennan, nos grandinan, pa tur siudadano di Kòrsou i pa e generashonnan ku ta bini.
Mi kerido pueblo di Kòrsou: union ta hasi forsa, speransa ta move montañanan i lantamentu di nos bandera ta demostrashon di e promesa ku nos nunka lo bandoná e lucha pa un mihó Kòrsou.
Felis Dia di Bandera 2025!
BIBA KÒRSOU!
