Brantwer Kòrsou ta entregá “Dekkingsplan Brandweer Curaçao” na Minister di Hustisia Shalten Hato

Brantwer Kòrsou ta entregá “Dekkingsplan Brandweer Curaçao” na Minister di Hustisia Shalten Hato

Willemstad, – Brantwer Kòrsou ta satisfecho pa anunsiá ku e estudio independiente riba e dos aspekto esensial di brandweerzorg, “Dekkingsplan Brandweer Curaçao” i “Risicoprofiel Brandweerzorg”, ta kla. E plan aki lo bai ser presentá na Konseho di Minister den luna di Ougustus 2025.

“Brandweerzorg” ta un tarea ku ta bai mas leu ku solamente paga kandela. E ta kompilá tur esfuerso pa prevení, minimalisá i kombatí kandela, peliger pa hende i bestia, ku ta inkluí maneho di insidentenan ku material peligroso. Pa por logra esaki, mester tin planifikashon stratégiko ku ta basa riba riesgo real i kapasidat aktual.

E estudio ku a tuma lugá ku profeshonal di Brantwer Hulanda, ta e promé aktualisashon formal for di aña 1995. Un desishon nesesario, pa motibu di e desaroyonan kontinuo den nos komunidat i na nivel global, ku ta eksigí un brantwer prepará i adaptá na realidat nobo.

E “Dekkingsplan” ta duna klaridat riba e posishon stratégiko di e 4 kazèrnenan i ofisina prinsipal di Brantwer Kòrsou, e sorto di ekipo nesesario i e kantidat di personal pa por atendé ku diferente tipo di insidente. E plan lo sirbi komo un instrumento esensial pa tuma desishonnan riba distribushon di rekurso, mehorando asina efisiensia i efektividat operashonal.

Na su banda, e “Risicoprofiel Brandweerzorg” ta mapa e rísikonan mas relevante ku ta menasa seguridat di nos isla, i ta duna direkshon riba ki akshon ta nesesario pa prevení i mitiga esakinan. E perfil aki ta yuda pa duna kontenido konkreto na manera ku brandweerzorg ta wòrdu integrá den otro aspekto di seguridat públiko.

Ku e dos dokumentonan aki, Brantwer Kòrsou ta prepará mihó pa atendé ku desaroyonan i rísikonan emergente, fortifikando su kapasidat pa defendé i sirbi nos komunidat den kualke situashon di krísis.

Durante e presentashon na Minister Shalten Hato, e ekspertonan profeshonal a duna di konosé ku tabata un bon desishon di Gobièrnu di Kòrsou pa traha un kazèrne nobo na Montaña, mirando ku esaki ta bini komo un di e nesesidatnan tambe den e investigashon ku a ser realisá. Tambe a mustra Minister di Hustisia, mr. Shalten Hato e importansia di ekipá Brantwer Kòrsou aun mas mihó pa por atendé ku kualkier tipo di eventualidat riba nos isla. Despues di reseso di Konseho di Minister, lo bai presentá e “Dekkingsplan” aki na demas Ministernan mirando ku ta un proyekto ku ta akapará mas Ministerio i ta di importansia pa desaroyo general.