Pietermaai ta amplia ku mas kamber turistiko

Willemstad – Minister Charles Cooper, huntu ku e Servisio di Planifikashon Urbano (ROP), a otorgá ofishalmente un pèrmit di konstrukshon na Pietermaai 67-69 ku desaroyo di un hotel den zona turistiko di Pietermaai.

E proyekto nobo, yamá ‘Pietermaai 67-69’, ta konsistí di 30 kamber di hotel riba su mes ku su propio pisina privá i un restorant. E proyekto ta konsistí di 2 monumento ku lo wòrdu restaurá i un edifisio nobo ku lo ser konstruí riba un tereno ku un área total di aproximadamente 1.000m².

‘Pietermaai 67-69’ a wòrdu diseñá pa e arkitekto Heren2, i e diseño di interior tambe ta obra di Heren2. E proyekto ta ideal pa bishitantenan ku ta buska espasio, luho i privasidat, i ta kombiná bon ku e demanda di vakashon di haltu nivel na Kòrsou. E proyekto ta kumpli ku e tipo di bishitantenan di estadia largu di Pietermaai komo un kompleho integrá den nos sentro di siudat.

E konstrukshon ta plañía pa kuminsá den yüli 2025, i ta spera pa den 2027 esaki terminá. E invershon ku ta unu di algun millón lo wòrdu kubrí dor di un grupo lokal di desaroyadó, institunan finansiero lokal i un fondo di restorashon di Hulanda.