Lei di bion nobo ta bai kita e opstákulo pa hóbennan riba merkado laboral

Lei di bion nobo ta bai kita e opstákulo pa hóbennan riba merkado laboral
Benefisio fiskal pa doño di trabou i hóbennan disponibel solamente riba petishon i bou di sierto kondishonnan
E lei di bion nobo a wòrdu introdusí pa stimulá partisipashon di hóbennan i adulto hóben riba merkado laboral. E lei aki a drenta vigor entrante 1 di yüli 2025. E lei aki, ta enfoká riba kombatimentu di desempleo bou di hóbennan di un manera struktural. P’esei e lei aki tin komo meta prinsipal pa hasi mas atraktivo pa doñonan di trabou kontratá hóbennan entre 18 i 29 aña.
E benefisionan ku e lei ta ofresé no ta válido outomátikamente. Un doño di trabou mester hasi un petishon formal serka Inspector di Impuesto pa por hasi uso di e benefisionan di e lei aki. E petishon mester wòrdu hasí no mas lat ku dos siman despues di kuminsamentu di aña fiskal, òf dos siman despues di ku e empleado a kuminsá su trabou. E lei ta aplikabel solamente pa hóbennan ku na momentu ku nan a wòrdu kontratá no a yega e edat di 30 aña. Tambe e hóben òf adulto hóben aki mester ta inskribí na kranshi.
Pa por kalifiká pa e eksonerashon di loonbelasting i e werkgeversdeel di e primanan sosial, e doño di trabou mester kumpli ku e siguiente kondishonnan:
- E mester ta kumpliendo ku tur su obligashonnan fiskal,
- E mester tin un kontrakt di trabou formal ku e empleado,
- E mester tene un atministrashon di pago korekto ku ta reflehá e uzo di e lei.
Si Inspecteur der Belastingen no tuma un desishon riba e petishon den un término di dos siman, e petishon ta wòrdu konsiderá di a keda aprobá. Tene na kuenta, ku si despues bin resultá ku e doño di trabou no a kumpli ku e kondishonnan, e benefisio fiskal mester wòrdu pagá bèk kompletamente.
Doñonan di trabou ku no ta kumpli ku e kondishonnan stipulá, ku konsientemente ta duna informashon robes òf ku ta ninga di duna e informashon rekerí, por haña un but te ku un máksimo di XG 5.000,-.
Un otro benefisio importante den e lei ta e eksonerashon di impuesto riba overtaim. E eksonerashon aki ta aplikabel un máksimo di 520 ora pa aña (10 ora pa siman), bou di e siguiente kondishonnan:
- e entrada bruto anual di e empleado ta ménos ku XCG 84.396 (den aña 2025), • i e overtaim tuma lugá den un relashon di trabou formal ku un doño di trabou regular. • Tambe mester hasi un petishon apart na Inspectie der Belastingen pa por bini na remarke pa e eksonerashon aki.
Den e kaso aki tambe ta konta ku Inspecteur der Belastingen mester tuma un desishon riba e petishon den un término di dos siman. Si esaki no sosodé, e petishon ta wòrdu konsiderá di a keda aprobá.
E provishon den e lei ku ta oumentá e rendimentu fiktisio riba pagonan di Curacaose beleggingsvennootschappen (CBV) di 4% pa 10% lo drenta na vigor riba 1 di ougùstùs 2025. Asina e pagadó di belasting ta haña sufisiente tempu pa adaptá na e kambio.
Pa mas informashon tokante e kondishonnan òf e prosedura di petishon, bishita e wèpsait di servisio di impuesto via http://www.belastingdienst.cw.