KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

‘‘Klínika Capriles ta laga pashènt mental vulnerabel na kaya’ 

 

 

 

 

 

‘‘Klínika Capriles ta laga pashènt mental vulnerabel na kaya’ 

Minister Silvania ta reakshoná riba siere di Un Mihó Mañan i ta pidi aklarashon di direktor di Klínika Capriles, Henk Kamsteeg. 

Willemstad, 26 di yüli 2025 — Minister di Salubridat Públiko, Medio Ambiente i Naturalesa (GMN), Sr. mr. drs. Javier Silvania, a tuma nota ku asombro di e desishon di GGZ Kòrsou pa  sera e departamento Un Mihó Mañan di Klínika Capriles. Ta trata aki di un desishon ku a  wòrdu tumá sin konsultá ku Minister i ku ta afektá un di e gruponan mas vulnerabel den  komunidat: (èks) drogadikto ku problema sikiátriko grave i ku no tin kaminda di keda. 

Den un karta ofisial dirigí na direktor Henk Kamsteeg di Klínika Capriles, minister ta pidi  aklarashon tokante e desishon akí i ta puntra ki akohida ta bai ofresé e pashèntnan en  kuestion. Siere di e departamento ta asta mas lamentabel mirando ku, den e último  periodo di gobernashon, minister Silvania a oumentá e aporte finansiero anual na GGZ  Kòrsou ku 3,4 mion florin pa por yega na un kuido di salú mental mihó i mas struktural. 

Segun e informenan den medionan di komunikashon, a ‘uitbehandel’ algun di e  pashèntnan. Tokante esei, minister tin sierto pregunta: ‘Kiko ke men ku bo ta deklará ku un  hende ta ‘uitbehandeld’, siendo ku su famia ta splika ku nan no tin manera di wak p’e? E  echo ku no tin un opshon pa akohé e grupo akí no solamente ta krea un peso ku komunidat  no por karga, ma ta trese sierto peliger kuné tambe.’ 

Fuera di esei, Minister ta mustra riba e echo ku na 2021, Klínika Capriles a sera e servisio di  akohida di anochi Dios Yudami tambe, ku tabata pa persona ku un adishon króniko, i ku for  di e dia ei tabatin un oumento den e kasonan di molèster raportá den sentro di siudat.  

Minister Silvania ta di opinion ku Klínika Capriles mester evaluá seriamente di habri e  servisio di akohida akí bèk. 

For di 2023, GMN ta trahando riba un reforma struktural di kuido di salú mental. Bou di e  título ‘di Fragmentashon pa Enfoke’, ta trahando pa yega na un solo organisashon integral di  kuido di salú mental, kaminda instituto manera GGZ Kòrsou, PSI Skuchami i Brasami lo bini  huntu den un solo fundashon: Fundashon Pa Nos Salú Mental. E meta ta di yega na mas  kolaborashon i ménos redundansia, i pa e pashèntnan por pasa ku mas fasilidat di un fase  di kuido pa otro. 

‘Siere di Un Mihó Mañan ta bolbe mustra dikon nos ke yega na un solo organisashon di  kuido mental mas lihé posibel,’ segun minister Silvania. ‘Nos no por afòrt mas fragmentashon, inklaridat i falta di koordinashon i guia. Ta e pashènt ta sentral, no e  instituto.’

Minister ta spera un reakshon por eskrito di direktor Henk Kamsteeg di GGZ Kòrsou riba  shete pregunta, mas tardá djárason 30 di yüli 2025, 5 or di atardi. E preguntanan ta  konkretamente tokante e desishon ku a tuma i tokante futuro di e pashèntnan en kuestion.  Minister ta konta riba kooperashon aktivo di tur partner di kuido di salú mental, pa nos por  konta ku un kuido aksesibel, responsabel i kaminda hende ta sentral.

639114718427035"
639114718427035"