Centrale Bank van Curaçao en Sint Maarten ta publiká Relato Anual 2024 Bon Kresementu i Resultado Sólido
Centrale Bank van Curaçao en Sint Maarten ta publiká Relato Anual 2024
Bon Kresementu i Resultado Sólido
WILLEMSTAD/PHILIPSBURG — Den un aña ku a keda karakterisá pa desafio na nivel mundial, Centrale Bank van Curaçao en Sint Maarten (CBCS) a logra vários adelanto supstansial: supervishon mas fuerte di sektor finansiero, un sistema di pago mas moderno i un solushon adekuá pa Ennia su doñonan di pólisa. Den su relato anual di 2024, publiká resientemente, CBCS ta raportá un ganashi histórikamente haltu di Cg 46,6 mion. E relato anual ta duna un bista amplio di CBCS su governance, strategianan, operashon i estado finansiero pa fecha di 31 di desèmber 2024.
E nivel haltu di ganashi tabata danki na un oumento di mas ku Cg 33 mion den entrada neto di interes i un oumento di kasi Cg 18 mion den rendimentu di invershon. E oumento den entrada di interes ta debí entre otro na un nivel mas haltu di kapital invertí: A bende parti di e reserva di oro i invertí su balor den bono estadounidense di plaso largu. Por sierto, debí na e oumento fuerte den preis di oro, pa fin di 2024 e reserva di oro tabata bèk na kasi e mesun nivel ku e tabata promé ku e benta. E oumento den rendimentu di invershon ta danki tambe na e strategia aktivo i dirigí ku CBCS a bini ta hiba.
Banda di e prestashonnan riba tereno finansiero, CBCS a alkansá vários logro balioso den kuadro di su tareanan prinsipal. Den e último añanan, a dal vários paso importante pa fortifiká supervishon di sektor finansiero na Kòrsou i Sint Maarten. Na yüni, CBCS a publiká e informe final tokante e promé fase di su programa di reforma pa sektor finansiero. Algun di e logronan importante ku por menshoná ta lo siguiente: introdukshon di un early warning monitoring system, publikashon di informe anual di stabilidat finansiero, kreashon di un sistema di garantia di depósito, un solushon kuidadoso pa e situashonnan heredá relashoná ku Girobank i Ennia, introdukshon di un aserkamentu nobo di supervishon basá riba riesgo, fortifikashon di CBCS su governance interno i komunikashon mas habrí i transparente ku tur stakeholder. Na fin di 2024, tabatin 400 instituto finansiero bou di supervishon di CBCS.
Na 2024, CBCS a dal paso importante pa stabilidat di nos sistema finansiero tambe. Na kuminsamentu di aña, CBCS a publiká e di tres edishon di su Informe di Stabilidat Finansiero. Ta interesante pa menshoná ku, na un seminario regional di Caribbean Regional Technical Assistance Centre (CARTAC), e publikashon akí a ser elogiá komo un ehèmpel pa e otro bankonan sentral den region di Karibe. Tambe, CBCS a kompartí su konosementunan aktivamente ku e otro entidatnan supervisor den region, entre otro riba tereno di stress testing i resiliensia di sektor finansiero.
Por último, a lanta CBCS Innovation Office pa stimulá inklushon i inovashon finansiero. Tambe, komo un logro importante pa yega na introdukshon di florin karibense, a revelá e diseñonan
ofisial i a lansa un kampaña nashonal di informashon. I internamente, CBCS a sigui optimalisá su programanan di cybersecurity, sostenibilidat i desaroyo di personal.
E resultadonan akí ta muestra di CBCS su dedikashon na stabilidat, resiliensia i inovashon. Un enkuesta resien pa midi e nivel di satisfakshon bou di CBCS su stakeholdernan a mustra ku e esfuersonan akí ta oumentá e konfiansa ku e stakeholdernan tin den e manera ku CBCS ta funshoná. Den e enkuesta, 91% di e partisipantenan a indiká ku nan tin un opinion (relativamente) positivo di CBCS i 86% a indiká ku nan tin konfiansa den e organisashon. Pa 2025, Banko Sentral lo sigui traha pa un tasa di kambio stabil, un sektor finansiero sólido i íntegro, i un sistema di pago sigur i aksesibel ku lo kontribuí na kresementu ekonómiko sostenibel pa e habitantenan di Kòrsou i Sint Maarten.
E teksto kompleto di e Informe Anual di 2024 ta disponibel riba wèpsait di CBCS, na: https://www.centralbank.cw/publications/annual-report/2024.
Willemstad, 1 di ougùstùs 2025
CENTRALE BANK VAN CURAÇAO EN SINT MAARTEN
