Minister Silvania ta risibí direktiva nobo di Vereniging Bedrijfsleven  Curaçao (VBC) 

Minister Silvania ta risibí direktiva nobo di Vereniging Bedrijfsleven  Curaçao (VBC) 

Djabièrnè 15 di ougùstùs, Minister di Finansa, Salubridat Públiko, Medio Ambiente i  Naturalesa, Sr. Javier Silvania, a risibí e direktiva nobo ku a keda elegí di Vereniging  Bedrijfsleven Curaçao (VBC). Durante e enkuentro pa sera konosí, a trata vários tema sosial i  ekonómiko importante, manera introdukshon di un sistema di BTW, Entree Fee, moratorio riba  pèrmit di empleo, futuro di AOV i redukshon di e kosto di hasi negoshi riba nos isla. 

Tantu Minister komo direktiva di VBC a ekspresá un deseo pa traha huntu na un manera  konstruktivo pa yega na solushon i reforma ku lo kontribuí na un ekonomia sólido, un bon  klima pa hasi negoshi i bienestar pa un parti mas grandi di pueblo di Kòrsou. 

Komo resultado di e kòmbersashon, a keda palabrá ku Minister i VBC lo reuní un biaha kada  kuartal pa tene konsulta regular, pa asina por monitoriá di aserka i koordiná desaroyo di e  temanan ku a keda tratá. 

Minister Silvania a enfatisá ku partisipashon di sektor privá ta un faktor esensial pa maneho eksitoso: “Kolaborashon entre gobièrnu i sektor privá ta di gran importansia pa por realisá  kresementu i empleo duradero. Ta trahando huntu so nos por logra yega na stabilidat i  progreso.” 

Direktiva nobo di VBC a ekspresá su apresio pa e posishon reseptivo di Minister i, komo  organisashon ku ta representá interes di sektor privá, VBC a reafirmá su kompromiso pa kontribuí aktivamente na desaroyo i implementashon di maneho ku ta na interes di Kòrsou.