PRIMU TA MATA PRIMU

Mianta na Coba Lodo tabatin un bringamento cu a termina malo y cu Rene Paesch morto. Na sitio un detencion a cay y aki a bay cu un di e primonan. Ta trata di Gilbert Paesch. Sinembargo, polis ta buscando su ruman, pues e otro primo, esta e conocido Israel Paesch.

E motibo cu ta buscand’e ta pa e duna cuenta di unda e tabata marduga y mainta. Tin indicacion cu e por ta of ta e sospechoso principal di morto di Rene Paesch na Coba Lodo. Hopi informacion a bin dilanti y ta bisa cu di basta tempo nan tin problema cu otro y un motibo grandi bisa ta pa un hende muhe. Mirando cu ambos a bringa algun dia atras y ta bisando cu diasabra pa manece diadomingo nan a topa cara cara. Esey ta pone cu Israel Paesch ta e persona di interes pa polis. Despues di e sucedido entre e primonan, Israel Paesch a bandona sitio. Ta consider’e fugitivo n’e momentonan aki. Polis ta pidi esunnan cu por tin cualkier informacion di loke a pasa den ora di mainta of sa algo di Israel Paesch, pa tuma contacto cu nan. Entretanto, mirando cu Israel Paesch tin boto y ta hende di lama y cu vinculo estrecho cu Venezuela, a activa Wardacosta pa ta mas atento y activo pa posibel huymento. Mester menciona cu diasabda marduga atrobe e dosnan a bringa. Algun siman pasa na un bar na Tanki Leendert y awo den un bar na Palm Beach. Nan lo a topa despues na cas di e primo Gilbert caminda cu e situacion a bay for di man atrobe. Con Israel a mata Rene ainda no ta confirma. Polis ta mantene nan declaracion cu nan a haya Rene morto pero no por sigura con. Parce cu e dokter forensico no por a haya ningun perforacion di bala na curpa di e victima. Esey ta pone cu tur escenario ta riba mesa, manera por a dal e cu un obheto duro of te hasta dal e cu auto. Te awo no ta parce cu el a muri di un tiro for di un arma di candela. Israel Peasch mes ta kere cu ta cu tiro el a mata su primo. El a bisa di a los dos bala riba dje. Parce cu Israel a fada cu constantemente e tin problema cu su primo, cu den pasaso a hasta yega di kima su boto. E problema ta bay di hopi aña pasa caba. Polis a institui un ekipo dedica na investiga e crimen aki. Ta uzando tambe e Team di Aresto pa por efectua e detencion na momento cu haya e sospechoso, como cu ta imagina cu e lo ta arma y peligroso.

Diasabra mainta a habri c’un noticia hopi lamentabel caminda dos homber, den e caso aki segun informacion cu nos a ricibi ta primo y tabatin un problema. Un homber, esta Rene Paesch, a fayece na sitio. Polis a detene un tal Gilbert Paesch na sitio como un persona di interes, pasobra nan ta basta convenci cu e sospechoso principal lo ta un tal Israel Paesch.  Esaki a sosode na Coba Lodo. Segun informacion recien, tabata rond di mainta subida di solo cu e primonan Israel y Rene Paesch lo mester a cuminsa bringa pa algun motibo of otro. Poco dia pasa Rene a agredi Israel y a habri su cabes. Awe el a yega su cas pa regla cuenta. Bisiñanan a scucha desordo cu brommer di trempan y despues a scucha tres tiro, pero no por bisa si esey ta e caso of tabata zonido. Kico precies ta e obheto cu a mata Paesch no ta conoci y esaki ta bou investigacion. Ora polis a yega a detene Gilbert Paesch, cu probablemente tabata na e sitio y lo por conta mas di kico a sosode na e sitio.

Informacion ricibi ta cu Israel Peasch a entrega su mes, aunke por a mira team di aresto a drenta den e cas y sali bek sin nada den man. No por sigura si e ta deteni of no. Tabata tin algun hende ta bisa cu alcohol a hunga un rol. Loke

exactamente a sosode ainda no ta conoci.

E famia a yega di cay cera caba den pasado y ta conoci pa husticia. Ta sospecha cu nan ta anda den baho mundo y ta move hopi riba lama, etc. Kico a sosode cu nan a haya guera cu otro, lo mester sali di e investigacion.

E storia ta largo. Rene y Israel ambos ta Paesch. Ambos ta primo di otro. E rabia di Rene riba Israel ta relaciona cu un botin di placa di un atraco tira riba Hulp Bestuurskantoor na Savaneta den 2017. Awe nan dos ta enemigo di otro. Te awe Rene Paesch ta tilda Israel Paesch di a bay cu e botin di placa of a haya parti di e botin y e mes y otronan nunca a haya placa di e atraco aki. Di 2017 den cel na KIA e tabata wordo agredi malamente door di Rene.

Tres sospechoso so a sinta e castigo den KIA. Rene y Israel ta dos di nan. E dosnan cu a huy den otro auto cu e placa ta biba uno na Hulanda y otro na Colombia. Awe dimes e placa no t’ey. Di otro banda Rene ta keda insisti cu Israel a haya parti di e botin y a gast’e sin parti esaki. Israel ta para riba cu nunca el a haya placa. Tur loke Israel a haya ta castigo y golpi tras di golpi di Rene Paesch. Awe cos a caba na malo despues cu atrobe Israel a haya un bati pafo di Lekker. Djey el a bay cas y Rene a yega riba brommer pa sigui cu agresion.

Eynan si tur maltrata Israel bou influencia a topa cu Rene. Nan a bringa y aki Israel a tira Rene. Israel ta insisti cu el a tira mata. Ademas el a pidi su ruman pa entrega e arma cu ta un pistol di 9mm na autoridad. Parce cu e ruman deteni no a haci tal. Kiermen awo e mester djis splica unda e arma ta. E arma aki mester wordo entrega na autoridad. Pa e ruman Gibi logra su libertad e mester a warda Israel drenta y awo e arma keda confisca pa por logra su libertad. E mes no ta envolvi den e matamento. Un situacion di 2017 cu awe caba den un matamento na Coba Lodo diasabra mainta prome cu solo a sali.

Korteseia di 24ora, https://24ora.com/

Si bo no tin facebook ta posibel wak e video mas abou