Oumento di aktividatnan kriminal den area di Scharloo i Fleur de Marie.
Na: Presidente di Parlamento di Kòrsou
Sr. Fergino H.E. Brownbill
Wilhelminaplein 4
Presente
Willemstad, 2 sèptèmber 2025
Tópiko: Oumento di aktividatnan kriminal den area di Scharloo i Fleur de Marie.
Honorabel Sr. Brownbill,
Pa medio di e karta aki suskrito ta hasi uso di artíkulo 96 di Areglo di Estado i ta pidi enkaresidamente pa bo persona por dirigí e solisitut aki, ku e tópiko: ‘Oumento di aktividatnan kriminal den area di Scharloo i Fleur de Marie’, na Minister di Hustisia sr. Hato.
Atentamente,
Sr. Quincy Girigorie
Frakshon di PAR
Parlamento di Kòrsou
Ministerio di Hustisia
Sr. S. Hato
Wilheminaplein z/n
Presente
Kòrsou, 2 di sèptèmber 2025.
Tópiko: Oumento di aktividatnan kriminal den area di Scharloo i Fleur de Marie.
Apresiabel sr. Hato,
E bario di Fleur de Marie i besindario ta kayendo den otro i a bira tera fertil pa aktividatnan kriminal. Na aña 2008 a inisiá e trayekto pa alsa e kalidat di bida di habitantenan di Fleur de Marie i e besindario en general. A invertí rekursonan finansiero i humano, ku gran éksito. Por a tuma nota di un adelanto remarkabel, a mehorá infrastrukturá, kompanianan a skohe e bario pa establesé, habitantenan mes a habri nan negoshinan i tabata biba ku plaser den e bario. Un bario ku a fungí komo ehèmpel pa otronan. Ta un tristesa pa wak tur e esfuersonan aki desvanesé dilanti nos wowonan.
E área di Fleur de Marie i besindario ta den un dekadensia, ku ta imposibel ku nos ministerio di Hustisia no ta mira, ni tuma nota di dje. E área ta birando un atrakshon pa aktonan ilegal, for di bringamentu, ladronisia, trafikashon di droga, tráfiko di hende, prostitushon i hopi mas.
Habitantenan ku tin años ta biba den e bario i a mira e desaroyo di e último añanan ta yora di nostalgia pa nan bario di Scharloo i Fleur de Marie. Ku awa den nan wowo, nan ta konta e historia riku di nan bario. Awe di baina nan por habri nan porta di kas den oranan di atardi kwe anochi, pa e peligernan presenté. Den nan desesperashon, na aña 2024 nan a manda un karta di súplika pa minister di Hustisia, minister di GMN, minister di EO, Parlamento i kuerpo polisial.
Awor aki, e bario di Fleur de Marie ta hala atenshon, pa tur e mal motibunan. Peaton i autonan motorisá ta pasa for di atardi te anochi lat den e hanchinan di Scharloo pa mira loke ta keda ofresé i/òf pa sumergí nan mes den e bida nokturno di e área. Kasnan a keda transformá den kamber pa tene sèks. Áreanan rekreativo i deportivo di e bario a bira ‘hangplek’ pa bende droga i otro aktividatnan kriminal, violensia a bira orden di dia. Tur esaki ta stroba i kibra e nukleo sosial di e bario; Lokual ta e ‘netwerk’ di relashonnan informal i formal, e koheshon sosial entre bisiñanan i e sintimentu di konektividat ku e bario. E nukleo sosial ta basá riba interakshon, konfiansa mutuo i e disposishon pa yuda otro, loke ta krea un rèt di sosten kolektivo, fuerte i resiliente pa tur ku ta biba den e bario. Kibra esaki i bo a kibra kualke bario !!!!
E transformashon kultural ku e área ta pasando den dje, mester a yega na orea di minister sr. Hato i di hefenan di kuerpo polisial. I no ta keda mi nada otro pa puntra kua ta posibel motibunan pa kual nos ta laga e situashon aki perdurá. E impakto sosial i di salú públiko ku esaki ta trese kun’é ta enorme; sifranan di sifilis, bou di hende hòmber di edat avansá ta oumentando, gonorea i HIV bou di hóbennan tambe ta subi.
Den kuadro di esaki suskrito tin algun pregunta:
- Minister Hato a tuma nota di e karta di habitantenan di bario di Fleur de Marie fechá 25 di novèmber 2024? I si esaki ta e kaso, minister a duna siguimentu na e karta aki ? I sí esaki no ta e kaso, kon por ta, ku e súplika di e habitantenan di Fleur de Marie no a yega na Minister di Hustisia?
- Minister ta konsiente di e oumento di aktividatnan kriminal den Scharloo i Fleur de Marie, inkluso trafikashon di droga, trafikashon di hende, prostitushon i bringamentu?
- Kua medidanan konkreto Ministerio di Hustisia a tuma te awor aki pa pone un fin na esakinan? I den kuantu tempu e habitantenan di e área por spera un mehorashon di e situashon i protekshon di parti di gobièrnu?
- Kon minister ta evaluá e riesgo ku Scharloo i Fleur de Marie por bira un tipo di “no go zone” pa lei i òrdu?
- Kua ròl kuerpo polisial tin aktualmente den protehá e habitantenan di Fleur de Marie i besindario? Tin rekurso humano i medionan finansiero sufisiente, pa protehá e bario manera mester ta? Kuerpo polisial i/of ministerio di Hustisia tin un ‘gedoogd beleid’ pa loke ta trata prostitushon den e área di Scharloo i Fleur de Marie?
- Minister por informá Parlamento kua ta e akshonnan resiente ku e departamento di PATH a tuma pa kombati trafikashon di hende den e área di Scharloo i Fleur de Marie?
- Tin algun tipo di konsultá i/òf dialogo ku habitantenan i organisashonnan di bario pa buska solushon pa e situashon aki?
- Minister ta na altura ku e koheshon sosial di e bario ta kibrá i ku esaki ta hasi habitantenan mas vulnerabel pa partisipá den aktonan ilisito i/òf violento? Ademas e ta stroba un desaroyo sosial positivo pa e habitante, lokual por stroba e hende pa sigui krese?
- Ta eksistí algun plan integral (huntu ku ministerio di GMN i ministerio di EO) pa mehorá tantu seguridat komo salú públiko den Scharloo i Fleur de Marie?
- Minister a risibí informashon tokante e oumento di sifranan di HIV, gonorea i sifilis a konsekuensia di e aktonan di prostitushon den e área, serka e ministerio di GMN? Kua paso ministerio di Hustisia ta bai tuma pa prevení ku Kòrsou su salú públiko ta bai keda mas afektá, dor di e prostitushon sin kontròl ku ta tumando lugá den e área di Scharloo i Fleur de Marie?
Suskrito ta spera di por risibí e kontestanan di e preguntanan aki, den un tempu responsabel. Esaki pa evitá ku nos ta sinta wak un di nos barionan modelo, sigui kai den deterioro.
Atentamente,
Sr. Quincy Girigorie
Frakshon di PAR
Parlamento di Kòrsou