A drecha fasilidatnan pa públiko na playa di Caracasbaai, Baya Beach i Directeurs Baai
A drecha fasilidatnan pa públiko na playa di Caracasbaai, Baya Beach i Directeurs Baai
Willemstad – Resientemente Minister Presidènt señor Gilmar Pisas, ku alabes tin bou di su responsabilidad e sektor di Agrikultura, Medio Ambiente i Naturalesa, a hasi un rekorido na tres playa kaminda trabounan a tuma lugá den kuadro di “upgrading” di nos playanan. Ta trata aki di fasilidatnan ku a keda drecha òf konstruí na playanan di Caracasbaai, Baya Beach i Directeurs Baai.
Durante e bishita di trabou, Minister Presidènt a informá su mes personalmente di e progreso di e obranan i di e esfueso ku ta wòrdu hasí pa mehorá i hasi e playanan mas atraktivo, tanto pa komunidat lokal komo pa e hopi bishitantenan ku ta biahá pa nos isla. Na e playanan menshoná a drecha bankinan di palu i konstruí bankinan di betòn ku ta duradero i a pone palapa.
Na Caracasbaai a drecha 12 palapa, na Baya Beach a pone 8 palapa i a konstruí 4 banki i na Directeurs Baai a pone 4 palapa i a konstruí 4 banki. E “upgrading” di e playanan ta forma parti di un maneho mas amplio pa drecha fasilidatnan na nos playanan i kosta di forma duradero i alabes fortalesé nos sektor turístiko na un manera sostenibel. Durante e periodo ku ta bini, mas playa lo haña atenshon i lo informá komunidat debidamente di e desaroyonan aki
Minister Presidènt señor Gilmar Pisas a enfatisá na vários okashon e importansia di e balansa entre konservashon di nos áreanan natural, desaroyo di playa i desaroyo ekonómiko. Minister Pisas a ekspresá tambe su apresio pa e dedikashon ku kolaboradónan di Ministerio di GMN i miembronan di su kabinete ta desplegá pa realisá e importante proyektonan aki na benefisio di Kòrsou.
