Kòrsou su embahadora na e sertámen Universal Teen International, srta. Rayene Kirindongo a yega Kòrsou
Kòrsou su embahadora na e sertámen Universal Teen International, srta. Rayene Kirindongo a yega Kòrsou djárason 10 di sèptèmber 2025 pa 9 or di anochi riba vuelo di Arajet for di Punta Cana – Republica Dominicana.
Después di un eksitoso presentashon durante e sertámen Universal Teen International 2025 djasabra 7 di sèptèmber 2025, srta. Rayenne Kirindogo ku a konkistá e premio ‘Best National Costume’ i a resultá tambe den Top 6 di e sertámen Universal Teen International 2025 a wòrdu risibi na airopuerto Hato na su yegada pa sr. Shurendi Pieternella, parlamentario den representashon di sr. Roderick Middelhof, Minister di Desaroyo Ekonómiko enkarga ku Turismo. Tambe tabata presente sra. Farahnaz Antonia di gabinete di minister.
Representatenan di CICQ, famianan i konosinan tambe tabata presente na yegada di srta. Kirindogo,
Na e okashon akí sr. Pieternella a entregá na srta. Rayenne Kirindongo un ramo di flor komo muestra di gratitut i apresio i a felisitá nos Top 6 Universal Teen International 2025 ku e logronan optené.
CICQ manera na yegada di kada embahadora después di un presentashon na un sertámen internashonal, a organisá djabièrnè 12 di sèptèmber 2025 un agasaho estilo ”happy hour”, ofresé, un biaha mas, pa gerensia di Rustiq situá na Kura Hulanda.
Na e okashon aki a brinda pa e premiashon di srta. Rayenne Kirindongo i sr. Shurendy Pieternella a dirigi su mes tambe na nòmber di sr. Minister Middelhof, na srta. Kirindongo, su mayornan, gerensia di Rustiq, CICQ i demás presente.
Tambe sra. Farahnaz Antonia a dirigí su mes spesialmente na srta. Kirindongo, nos Miss Teen International 2025 srta. Lyze-Annah Stewart, i tambe na CICQ.
Komo muestra di apresio srta. Kirindongo a risibí un “gift card” serka CICQ.
CICQ ta gradisí inmensamente Minister di Desaroyo Ekonómiko sr. Roderick Middelhof i su staff, sr. Shurendi Pieternella, parlamentario, pa nan envolvimentu i tambe interés demostra pa ku trabounan desplega dor di CICQ.
CICQ ta gradisí tambe un bes mas mayornan di srta. Rayenne Kirindongo, Gerensia di Rustiq, medionan di komunikashon i tur persona i instansia ku di un forma òf otro a kontribuí ku partisipashon di nos embahadora na e sertámen di Universal Teen International 2025.
