Lucille George-Wout: Lider, ehèmpèl i balor histórico pa Kòrsou

 

Lucille George-Wout: Lider, ehèmpèl i balor histórico pa Kòrsou

WILLEMSTAD – Women Steering Committee Kòrsou ta ekspresá su gratitut profundo pa Sra. Lucille George-Wout, ku durante 12 aña a sirbi Kòrsou, komo pais outónomo den Reino Hulandes, ku onor komo su promé Gobernadó. E periodo largu ku e a sirbi, ta mustra e nivel di konfiansa i rèspèt ku komunidat i Reino tabatin den su persona.

Pero kontribushon di Sra. George-Wout ta bai mas leu ku solamente e ofisio di Gobernadó. Den su karera polítiko, e la laga un marka profundo: e tabata e promé hende muhé ku a fungi komo Diputado di Finansa di Teritorio Insular di Kòrsou i tambe e promé hende muhé ku a bira Presidente di Parlamento di Antia Hulandes. E dos puestonan aki ta muestra kla ku sra. George-Wout, basá riba su determinashon, prinsipio i boluntat fuerte, a logra hopi.

Sra. George-Wout ta konosí pa su karakter rígido i fuerte, integridat i persona di palabra. E kalidatnan aki a pone sra George-Wout bira un íkono. Su balentia, konsistensia i persistensia ta demostrá ki tipo di hende muhé e ta.

E tabata i ta keda un ehèmpel pa tur hende muhé di Kòrsou, i mas tantu pa mucha muhé ku tin su meta i ku tin ku luchá den un pais den kua machismo tin un ròl fuerte. Su éksitoito ta demostrá ku e hende muhé tambe por yega na nivel haltu di liderato, si nan ta traha duru, kere den nan mes i mantené nan prinsipio esei ta posibel.

Na nivel di polítika, Sra. George-Wout, su aporte ta hopi kla, no solamente pa Kòrsou, pero tambe pa Antia Hulandes. El a forma parti di un generashon di polítiko ku a kontribuí na desaroyo i formashon di struktura polítiko di nos region. Su trabou i ròl den Parlamento di Antia a lagá un herensia ku tin balor pa historia i pa futuro di nos pueblo.

Nos ta konvensí ku nos mester sigui hasi uzo di konosementu i eksperensia di Sra. George-Wout: su konosementu komo polítiko, komo lider ku konosé nos pais den su totalidat, i komo persona ku tin un bista kla riba desaroyo geo-polítiko. Nos mester duna su persona e balor históriko den nos pais.

Nos, komo WoMen’s Steering Committee, ta gradisí Sra. Lucille George-Wout pa su kontribushon balioso i su legado komo lider. Tambe nos ke gradisí su famia, spesial sr Herman George ku a dun’é e sosten nesesario pa e por kumpli ku su tarea komo gobernadó e último 12 aña. Nos ta ripití ku Sra. George-Wout, no solamente a sirbi su pais ku dedikashon, pero e tambe a habri porta pa e hende muhé den politika i den funshonnan komo lider. Pa esaki, nos ta ekspresá ku orguyo: Masha masha danki, Señora George-Wout, bo ta i lo keda un ehèmpel pa generashon di awe i di mañan.