Piskadónan a pidi i a haña… Ministerio di GMN a instalá 6 FAD den laman fin di siman ku a pasa

Piskadónan a pidi i a haña…

Ministerio di GMN a instalá 6 FAD den laman fin di siman ku a pasa

Willemstad-  Minister di Asuntunan General enkargá alabes ku sektor di Agrikultura, Medio Ambiente i Naturalesa señor Gilmar Pik Pisas, novèmber aña pasá a duna enkargo pa inisiá e proyekto di FAD’s. Esaki komo parti di su maneho pa garantisá disponibilidat di piská pa komunidat. FAD ta “Fish Aggregating Devices”, kual ta un struktura di bui i kabuya den laman ku ta atraé piská i na e FAD’s nan aki semper tin piská. Durante e fin di siman ku a pasa, Ministerio di GMN a baha un total di 6 FAD’s ku a keda elaborá aki na Kòrsou mes, den laman.

Durante un operashon basta grandi Ministerio di GMN a baha 6 di e buinan aki pa atraé piská na diferente sitio den nos awanan. E lokalidatnan kaminda a baha e buinan ta;
1. Playa Canoa N 12°12,664´, W 68 53,147´, 1,845
2. Sta. Catharina N 12°12,666´, W 68°48,138´ 2,969
3. Kabes Nòrt N 12°08,092´, W 68° 42,949´ 1,189
4. Nòrt Pafó N 12°09,959´, W 68°39,071´ 4,850
5. Klein Curaçao Punta Sùit N 11°57,673´, W 68°40,038´ 1,875 
6. Klein Curaçao Punta Nòrt N 11°01,309´, W 6840251 1,464

For di e periodo ku Minister Pisas a inisiá e proyekto aki te ku aworaki a baha un total di 12 FAD i e meta ta pa instalá 25 FAD te na final di e proyekto. Importante ta pa kuida e FAD’s. No mara boto na nan i den kaso liña pega na dje, kòrta e liña. Minister Pisas ta enfatisá ku mester mantené kupo di trabou den piskamentu tradishonal alabes oumentá peska i entrada di piskadónan. A instalá e FAD’s nan aki komo den nan serkania semper por enkontrá kantidat grandi di piská kual ta hasi piskamentu muchu mas fásil. E proyekto aki, huntu ku desaroyo di agrikultura i proyekto di boto pa piskadónan, ta proyektonan importante riba Kòrsou su kaminda pa alkansá seguridat alimentisio.