“Djaluna, 22 di sèptèmber 2025, Parlamento di Kòrsou tabatin un seshon di informashon ku Aqualectra.
“Djaluna, 22 di sèptèmber 2025, Parlamento di Kòrsou tabatin un seshon di informashon ku Aqualectra. Durante e seshon aki, CFO sra. Neysa Isenia a duna un presentashon detayá i a kontestá preguntanan ku Miembronan di Parlamento tabatin tokante e situashon resien di e apagon, e retonan den sektor energétiko i e plan di invershon pa garantisá un suministro mas konfiabel.
Seguidamente, Presidente di Parlamento sr. Fergino Brownbill huntu ku Miembronan di Parlamento i Kolaboradornan di frakshon a risibí e oportunidat pa bishitá e planta nobo di bateria di Aqualectra “Battery Energy Storage System” (BESS) na hòfi Mooi i e Sentro di Kontrol ful renobá. Presidente di Parlamento, Miembronan di Parlamento i Kolaboradornan di frakshon a haña un bista direkto riba e infrastruktura esensial ku ta sostené nos sistema di energia. E bishita a resultá den un diálogo balioso, fasilitando komprenshon mas profundo di e desaroyonan den nos sektor energétiko.”